Илон Маск коронавирус борасидаги ваҳимани аҳмоқлик деб атади

Коронавирус тарқалиши Tesla ишига ҳам таъсир кўрсатди. Январь ойида Хитойдаги Tesla Gigafactory заводи иши вақтинча тўхтатилди.

Фото: Reuters

SpaceX компанияси асосчиси ва Tesla раҳбари Илон Маск одамлар янги коронавирус тарқалишига ақл билан ёндашмаяпти деб ҳисобламоқда.

«Коронавирус сабабли ваҳимага тушиш аҳмоқликдир», — деб ёзди у Twitter аккаунтида.

Коронавирус тарқалиши Tesla ишига ҳам таъсир кўрсатди. Январь ойида Хитойдаги Tesla Gigafactory заводи иши вақтинча тўхтатилди. Завод аккумуляторлар ҳамда Model 3 ва Model Y автомобилларини ишлаб чиқаради. Маск февралда янги коронавируснинг авж олиши Tesla компаниясига сезиларли салбий таъсир кўрсатишини маълум қилди, деб хабар беради CNBC.

5 март куни Tesla бош қароргоҳи жойлашган Калифорнияда коронавирус сабабли биринчи ўлим ҳолати қайд этилди. Шундан сўнг штатда фавқулодда вазият режими эълон қилинди. Калифорния соҳилида 21 нафар йўловчисида коронавирус аниқланган круиз лайнери карантинга олинди.

Охирги маълумотларга кўра, бутун дунё бўйича коронавирусга чалинганлар сони 101 минг кишидан ошган.

Тайёрлаган Дилшод Аскаров

#Илон Маск #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.