Москвада карантин тартибини бузганлар 5 йилгача қамалиши мумкин

Коронавирус тарқалган мамлакатлардан келганлар изоляция тартибини бузадиган бўлса 5 йилгача озодликдан маҳрум этилиши мумкин. Бу ҳақда Москва соғлиқни сақлаш департаменти сайтида маълум қилинди, деб ёзади Би-би-си.

Россияда ўтган сутка давомида коронавирусга чалиниш билан боғлиқ учта ҳолат қайд этилди, деб хабар беради Интерфакс. Россияда ушбу касалликни юқтирганлар сони 17 нафарга етди. Касаллик билан боғлиқ янги ҳолатлар Москва, Калининград ва Белгород областларида рўйхатга олинган.

Маълум қилинишича, Россия ҳукуматининг фармойиши билан, коронавирус инфекцияси атрофдагиларга хавф солувчи касаллик деб белгиланган, санитария-гигиена чораларини бузиш эса Россия жиноят кодексининг тегишли моддаси билан жазоланишга олиб келади.

"Тартибга риоя қилиниши видеокузатув ёрдамида назорат қилинади, тартибни бузган фуқаро обсерваторга жойлаштирилиши кўзда тутилган", - дейилади сайтда.

Қайд этилишича, бу қоида туристлар ва Москвада регистрациядан ўтмаганларга ҳам тааллуқли.

Қонунчиликнинг бузилиши жавобгарликка, жумладан 5 йилгача муддатга озодликдан маҳрум қилишга олиб келади.

Аввалроқ Москва мэри Собянин коронавирус тарқалиши сабабли пойтахтда "юқори даражадаги тайёргарлик режими"ни жорий этишга буйруқ берганди.

Сайтда айтилишича, Эрон, Хитой, Жанубий Корея, Италия, Франция, Германия ва Испаниядан келганлар махсус телефон рақамига қўнғироқ қилиш орқали уйдан чиқмасдан тиббий варақа олишлари мумкин.

Аввалроқ Москва таълим ва фанлар департаменти 10 мартдан эътиборан коронавирус тарқалган мамлакатлардан келган талабалар пойтахтдаги олий таълим муассасаларида ўқишга қўйилмаслиги ва улар ўз турар жойида икки ҳафталик карантинда бўлиши, масофадан туриб таълим олишлари мумкинлигини маълум қилганди.