Украина Петербургга ҳужум қилди

Россия ҳаво ҳужумидан мудофа кучлари 4 июлга ўтар кечаси мамлакатнинг 18 та региони, аннексия қилинган Қрим, Азов денгизи ҳамда Қора денгизи узра Украинанинг 389 та дронини тўхтатган ва йўқ қилди, деб хабар берди Россия мудофаа вазирлиги. Россияга жами қанча дрон ҳужум қилгани маълум эмас, ҳарбий идора ҳисоботида фақат тўхтатилган дронлар ҳақида гап кетади.

Петербург ва Ленинград области. Петербург губернатори Александр Беглов шаҳарга кенг кўламли ҳужум уюштирилгани ҳақида хабар берди. Унинг сўзларига кўра, шаҳарда ва област ҳудудида жами 72 та дрон уриб туширилган, улардан бири Петергофга қулаган. Вайронгарчиликлар ва жабрланганлар ҳақида айтилмаган.

Шунингдек, Петербургнинг Киров районидаги нефт терминали ҳудудига ҳам зарба берилган. «Бумага» ва Astra нашрлари терминалда ёнғин чиққани акс этган фото ва видеоларни эълон қилган.

Петербург нефт терминали Петербургнинг асосий порти яқинида жойлашган бўлиб, темирйўл, қувурлар ва денгиз йўли орқали нефт ҳамда нефт маҳсулотларини ташишдаги муҳим тугун вазифасини ўтайди. Киров районидаги ушбу объектда 3 июн куни, Петербург халқаро иқтисодий форуми очилиши кунида амалга оширилган ҳужумдан кейин ҳам йирик ёнғин рўй берганди.

Astra нашри аниқлик киритишича, нефт сақланувчи резервуарлар эмас, терминал яқинидан ўтган темирйўлдаги цистерналар ёниб кетган. Расмийларга кўра, «техноген оқибатлар» аллақачон бартараф этилган. Яраланганлар йўқ. «Бумага» нашри терминал узра тутун кўтарилмаётганини ёзган.

Ленинград области губернатор Александр Дрозденко хабар беришича, Висоцк порти ҳудудига уриб туширилган дронлар парчалари тушган. Регионнинг бир неча районларида хусусий уйлар шикастланган. Маҳаллий аҳоли вакилларидан бир киши жароҳатланган: ушбу аёлга воқеа жойида тиббий ёрдам кўрсатилган, у шифохонага ётишдан бош тортган.

Украина президенти Володимир Зеленский Петербургга ҳужум юзасидан маълумот берди. «Украина мудофаа кучлари Россия уруши учун даромад келтирувчи портнинг нефт инфратузилмасига зарба берди, шунингдек, муҳим ҳарбий нишон – Кронштадтга ҳам зарба берилди. Украина давлат чегарасидан масофа – 850 километрдан ортиқ», – деган у ижтимоий тармоқларда.

Украина қуролли кучлари бош штаби гап РФ Болтиқ флоти «Кронштадт» базаси пункти ҳақида кетаётганини қўшимча қилган. Идора порт ҳудудида ёнғин чиққанини тасдиқлаган.

Украинларнинг Петербургга ҳужуми фонида Финландия мудофаа кучлари 4 июл тонгида Фин қўлтиғининг шарқий қисмида ҳаво ва денгиз кемалари ҳаракатига вақтинчалик чекловлар жорий этилишини маълум қилди.

Финландия қуролли кучлари матбуот хизмати Yle журналистларига берган изоҳида, бу чеклов Украинанинг Россияга қарши ҳарбий ҳаракатлари билан боғлиқлигини билдирган, аммо тафсилотлар келтирилмаган. Финландия ҳудудида дронлар ҳаракати қайд этилмаган.

Белгород. Белгород шаҳри ва агломерация 3 июл куни кечқурун Украина қуролли кучлари ҳужумлари туфайли зулмат ичида қолди. Шаҳарда электр таъминотида узилишлар бўлаётгани ҳақида «Пепел Белгород» ва «Осторожно, новости» манбалари хабар берган. «Пепел Белгород» маълумотига кўра, шаҳардаги барча асосий нимстанциялар бўйлаб бир вақтда ракета зарбалари берилган. «Луч» иссиқлик электр марказлари ҳудудида ёнғин чиққан.

Белгород области ҳукумати Украинанинг ёпирилма зарбалари туфайли электр энергияси ва ичимлик сув узатишда муаммолар юзага келганини тан олган. Регион раҳбари Александр Шуваев ҳужум оқибатида инфратузилма объектлари шикастлангани, бир қанча инфратузилма объектлари ҳудудида ёнғинлар рўй берганини тасдиқлаган. Аммо булар қандай объектлар эканига аниқлик киритилмаган. Унинг сўзларига кўра, ҳужум оқибатида жароҳатланганлар йўқ. 

Москва. Сўнгги бир кун ичида Украина Москва области томон 200 дан ортиқ дрон учирди, дейилади Москва шаҳри мэри Сергей Собяниннинг 4 июл куни соат 11 да берган ҳисоботида. Унинг сўзларига кўра, ҳаво ҳужумидан мудофаа кучлари дронларнинг катта қисмини «шаҳарга кириб келмасидан зарарсизлантирган». Украинанинг 62 та дрони Москва чеккаларида уриб туширилган. У ҳужум оқибатлари тўғрисида хабар бермаган. ТАСС давлат агентлиги хабарида бу Москвага сўнгги икки йил ичида амалга оширилган энг йирик ҳужум бўлгани қайд этилган.

Аннексия қилинган Қрим. Яриморолнинг РФ томонидан тайинланган раҳбари Сергей Аксеновга кўра, Украина ҳарбийлари томонидан 4 июлга ўтар кечаси амалга оширилган ҳужум оқибатида маҳаллий аҳоли вакилларидан бир киши ҳалок бўлган. Икки киши, жумладан, 10 ёшли бола яраланган.

Бундан ташқари, Удмуртияда Украина томонидан ҳудуддаги корхоналардан бири томон учирилган ракета уриб туширилган. Ҳудуд губернатори Александр Бречаловга кўра, вайронгарчиликлар ва жабрланганлар йўқ.