Москва ҳарбий суди Симонянга суиқасд иши бўйича ҳукм чиқарди

Москва шаҳридаги 2-Ғарбий округ ҳарбий суди RT телеканали бош муҳаррири Маргарита Симонянга суиқасд тайёрлашда, шунингдек, неонацистик ва Россияда террорчилик ташкилоти деб топилган NS/WP (National Socialism/White Power) ташкилоти фаолиятида иштирок этишда айбланган шахсларга нисбатан ҳукм чиқарди. Судланувчилар 6 йилдан 20 йилгача озодликдан маҳрум этилди.

Фото: Getty images

Маҳкама материалларига кўра, иш бўйича жами 12 нафар шахс жавобгарликка тортилган. Уларнинг аксарияти қўлга олинган пайтда вояга етмаган бўлган. Иш Россия Ички ишлар вазирлиги талабига биноан ёпиқ тартибда кўриб чиқилган. Бунга террорчилик ташкилоти томонидан эҳтимолий провокациялар юз бериши мумкинлиги сабаб қилиб кўрсатилган.

Айбланувчиларга террорчилик ташкилотини тузиш ва унда иштирок этиш, босқинчилик, безорилик, экстремистик фаолиятга оммавий чақириқ қилиш, миллий адоват ва нафрат қўзғатиш каби бир қатор жиноятлар юкланган.

Суд қарорига кўра, Михаил Балашов ва Егор Савелев Маргарита Симонянга суиқасд тайёрлашда айбдор деб топилган. Балашов 20 йил, Савелев эса 15 йил муддатга озодликдан маҳрум этилди. Қолган айбланувчиларга, жумладан вояга етмаганларга ҳам, 6 йилдан 18 йилгача қамоқ жазоси тайинланган.

«Медиазона» нашрининг ёзишича, Балашов ва Савелев қўлга олингач, уларга нисбатан қийноқлар қўлланган бўлиши мумкинлиги ҳақида маълумотлар берилган. Бу даъволар бўйича расмий идоралар томонидан тасдиқланган маълумот мавжуд эмас.

Россия Федерал хавфсизлик хизмати 2023 йил ёзида Маргарита Симонян ва журналист Ксения Собчакка қарши суиқасд режаси бартараф этилганини маълум қилган эди. Идоранинг таъкидлашича, бу режа Украина Хавфсизлик хизмати топшириғи билан тайёрланган. Кейинчалик эълон қилинган тергов материалларида Ксения Собчакнинг исми ишдан чиқарилган.

Тергов версиясига кўра, Михаил Балашов 2022 йил апрел ойида «Параграф 88» номли гуруҳни ташкил этган бўлиб, у NS/WP ташкилотининг маҳаллий бўғини сифатида фаолият юритган. Айблов томонининг билдиришича, Балашов миллатчилик ва миллий-социалистик қарашларни қўллаб-қувватлаган танишларини ушбу гуруҳга жалб қилган.

Шунингдек, тергов маълумотларига кўра, 2022 йил кузидан 2023 йил ёзигача «Параграф 88» аъзолари Марказий Осиё давлатларидан келган муҳожирларга қарши камида олтита ҳужум уюштирган. Айтилишича, улар жабрланувчиларни шафқатсизларча калтаклаб, ҳужумлар тасвирланган видеоларни интернет тармоқларида тарқатган.