Коронавирус: Франция маданият вазири вирусга чалинди. АҚШнинг Европадаги қўмондони карантинда

Франция маданият вазири Франк Ристер коронавирусга чалинди. Шунингдек, АҚШнинг қуруқликдаги қўшинларининг Европадаги қўмондони Кристофер Каволи коронавирусга чалинган киши билан мулоқот қилгандан кейин уйидан ишламоқда.   

Таъкидланишича, Франция маданият вазири Париждаги уйида қолмоқда ва ўзини яхши ҳис қилмоқда. Ристер ўтган ҳафта Франция парламентининг қуйи палатаси - миллий йиғинда бир неча кун бўлган. Айни вақтда парламентнинг 5 депутатида коронавирус аниқланган.  

Умумий ҳисобда, Францияда коронавирусга чалинганлар сони 1412 кишини ташкил қилмоқда, улардан 25 нафари ҳаётдан кўз юмган.

Шунингдек, АҚШнинг қуруқликдаги қўшинларининг Европадаги қўмондони  генерал-лейтенант Кристофер Каволи коронавирусга чалинган киши билан мулоқот қилган бўлиши мумкинлиги сабабли уйидан туриб ишламоқда. Бу ҳақда АҚШ қуруқликдаги қўшинлари вазири Райан Маккарти хабар қилган.

Шунингдек, Европадаги қўшинлар штабидаги бир неча киши ҳам ихтиёрий равишда карантинда қолмоқда.

Маккартининг таъкидлашича, ҳарбийлар яқинда ўтган анжуман вақтида коронавирусга чалинган киши билан алоқага киришган бўлишлари мумкин.