Суриялик курдлар коронавирус эпидемияси ортида ўт очишни тўхтатишга рози бўлди

Фото: Reuters

Суриялик курдларнинг “Сурия демократик кучлари” коронавирус эпидемияси ортида ўт очишни тўхтатишга рози бўлди.

Курдларнинг бу ҳақидаги баёнотини “Ал-Ҳадас” телеканали маълум қилди.

“Сурия демократик кучлари” қўмондонлиги Суриядаги ихтилофнинг барча томонларига БМТ бош котиби Антониу Гутерришнинг ташаббусини қўллаб-қувватлаш ва барча ерда ўт очишни тўхтатишни таклиф қилади”, дейилган баёнотда.

Аввалроқ БМТ бош котиби коронавирус пандемияси сабабли барча қуролли ихтилофлар томонларини ўт очишни тўхтатишга чақирганди. Сурияда курд отрядлари турк қўшинларига ҳамда Сурия мухолифати қуролланган тузилмаларига қарши жанговар ҳаракатлар олиб бормоқда.

22 март куни Сурия соғлиқни сақлаш вазири Низор Ёзижий мамлакатда коронавирусга чалинган илк бемор аниқланганини маълум қилганди. Шундан кейин расмий Дамашқ вирус тарқалиши хавфи сабабли аксарият давлат муассасаларини ёпди. Шунингдек, озиқ-овқат ва дори-дармон ишлаб чиқарувчи компаниялар ва муҳим объектлардан ташқари барча давлат ва хусусий корхоналар фаолияти тўхтатилган.

Тайёрлаган Шуҳрат Раҳимов

#курдлар #Сурия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.