ХВЖ Қирғизистонга коронавирусга қарши кураш учун 121 млн доллар ажратди

Бу ҳақда жамғарма сайтида маълум қилинган. Таъкидланишича, бу пандемия бошлангандан бери ХВЖнинг маъқулланган биринчи фавқулодда кредитидир.

Жамғарма Қирғизистонга тезкор молиялаштириш инструменти бўйича 80,6 млн доллар ва тезкор кредитлаш механизми доирасида 40,3 млн доллар ажратган.

Қирғизистон бу маблағларни коронавирус пандемияси сабабли тўловлар балансини тезкорлик билан мувозанатлаш учун олади. Бундан ташқари, мамлакат соғлиқни сақлаш тизими учун зарур захираларни озод қилиш имконига эга бўлади.

ХВЖ баёнотига кўра, эпидемия Қирғизистон учун макроиқтисодий прогнозни ёмонлаштирган ва 400 млн доллар миқдорида тўлов баланси тақчиллигини ҳосил қилган. 

“Коронавирсус пандемияси Қирғизистон иқтисодиётига қаттиқ зарба берди ва тўлов балансини мувозанатлашга ўткир эҳтиёжни пайдо қилди. Иқтисодиётнинг барча соҳалари вирусни тўхтатиш учун қабул қилинаётган чоралар натижасида қаттиқ таъсирга учраган”, деб айтган ХВЖ раҳбари Кристалина Георгиева.

Айни вақтда Қирғизистонда коронавирусга чалинганлар сони 58 нафарни ташкил қилмоқда. Республикада фавқулодда вазият тартиби киритилган.