Карантин пайтида дафн маросими учун ҳам вилоятдан вилоятга чиқишга рухсат этилмайди - ИИВ

Ички ишлар вазирлиги ахборот хизмати раҳбари Шоҳрух Ғиёсов карантин қоидалари барча ҳолатларга тааллуқли бўлиши ва дафн маросимини ҳам қамраб олишини таъкидлади.

«Карантин чекловлари халқаро тажриба ва талабларга асосан ўрнатилган. Афсуски, қанчалик оғир бўлмасин, ўрнатилган чеклов барчага истисносиз тааллуқли бўлиб, бошқа вилоятда бўлган яқин қариндошларингизнинг дафн маросимида қатнашолмайсиз», дейди у.

Шунингдек, оғир касал бўлган беморга тиббиёт муассасасидан жавоб берилган ҳолатда уни бир вилоятдан иккиняисига олиб ўтиш тартиби ҳам тушунтирилди.

«Агар сиз оғир касал бўлган фуқарони, масалан Тошкент шаҳридан ўзининг доимий яшайдиган бошқа вилоятига олиб бормоқчи бўлсангиз, унинг хақиқатан ўша вилоятда рўйхатда турганини исботловчи паспорти ва соғлиқни сақлаш ходимларини тегишли хулосаси асосида постлардан олиб ўтишингиз ва уйига элтиб қўйишингиз мумкин. Бунда, касални уйига олиб борган фуқаро, карантин чекловлари тугамагунча ортга қайтолмайди», дея вазирлик расмийсининг сўзларини келтирмоқда Kun.uz мухбири.