Хорватияда пандемия инқирозига қарши кураш учун 10 миллиард доллар талаб этилади

Хорватия молия вазири Здравко Марич N1TV телеканалига берган интервьюсида мамлакатда яқин бир неча ой ичида пандемия ортидан юзага келадиган инқирозга қарши кураш чораларини молиялаштириш учун 70 млрд куна (10 млрд АҚШ доллари) кераклигини маълум қилди.

EPA-EFE/Andrea Fasani

Reuters агентлиги тарқатган хабарга кўра, ҳукумат иқтисодиётни ривожлантириш учун кейинги уч ой давомида қатор солиқ тўловларини кечиктирди, айрим солиқ турлари бекор қилинди. Шунингдек, ҳукумат томонидан муаммоларга дуч келган компаниялар ишчилари маошининг бир қисмини тўлаш жорий этилди.

Давлат секторида эса ходимларнинг маошлари пасайтирилиши мумкин. Шу ҳафта охирида ҳукумат ва касаба уюшмалари ўртасида бу масала бўйича музокаралар ўтказилиши кутилмоқда.

«Биз инқирозга қарши кураш учун керак бўладиган маблағни биринчи навбатда ички манбалардан қидирамиз, аммо халқаро бозор ва молия институтларига ҳам мурожаат қиламиз», деган вазири.

Бугунги кунгача Хорватияда коронавирусдан зарарланиш билан боғлиқ 1343 ҳолат қайд этилган, 19 киши вафот этган. Ялпи ички маҳсулотнинг қарийб бешдан бир қисмини ташкил этадиган сайёҳлик соҳаси пандемия таъсирида касодга учраган.