Apple ва Google вирус юқтирган инсонларни кузатувчи технологияни ишлаб чиқади

Google ва Apple компаниялари коронавирус билан касалланган инсон кимлар билан мулоқотда бўлганини аниқлашга ёрдам берувчи технологияни ишлаб чиқиш учун кучларини бирлаштиради. Икки компания сайтларида шу ҳақдаги баёнот пайдо бўлди.

Таъкидланишича, бу фойдаланувчиларнинг хавфсизлигига салбий таъсир этмайди ва уларнинг шахсий ҳаёт дахлсизлиги ҳуқуқини бузмайди. Янги технологияни ишга тушириш ишлари бир неча ойни талаб қилиши мумкин.

Янги технология мамлакатлар ҳукуматларига коронавирус тарқалишини тўхтатишга ёрдам беради, бунга касалланган инсоннинг контактларини аниқлаш қўл келади. У икки босқичда ишга туширилади.

Биринчи босқичда Android ва iOS қурилмаларининг ўзаро ҳаракатини таъминлайдиган дастурий таъминот ишлаб чиқилади. Бу вазифа май ойида якунланиши режалаштирилган.

Иккинчи босқичда, компаниялар Bluetooth негизида ишлайдиган махсус платформа устида иш олиб боради. Айнан шу касалланганларнинг алоқа қилган кишиларини кузатади. Бу босқични амалга ошириш учун бир неча ой сарфланиши белгиланмоқда.

Тахмин қилинишича, коронавирус аниқланган янги технология фойдаланувчилари бу маълумотни иловага киритади. Шу билан беморлар билан яқин кунларда алоқа қилган кишиларга эслатма юборилади.