Испания ҳукумати аҳолига пул тарқатишни бошлайди

«Ҳукумат асосий харажатларини қоплашда жиддий қийинчиликларга дуч келган оилалар олдида мажбуриятни ўз зиммасига олади», — дейилади ҳукумат баёнотида.

Фото: AFP/Getty Images

Испания ҳукумати май ойидан «энг кам яшаш минимуми» миқдорида даромад топадиган оилаларга пул тарқатишга ваъда берди. Бу ҳақда El Mundo газетаси хабар қилди. Ёрдам мунтазам равишда кўрсатилади ва уни 1 миллиондан ортиқ оила олади.

Энг кам яшаш минимуми миқдори қанчалиги айтилмади. El Pais газетасининг маълумот беришича, амалдорлар ўтган ҳафтада 500 евро маблағни муҳокама қилган.

Испанияда тўрт ҳафтадан ортиқ вақтдан буён карантин режими амал қилмоқда. 16 апрель ҳолатига кўра, мамлакатда 180 мингдан ортиқ киши коронавирус юқтирган, 19 мингдан ортиқ киши вафот этган.

Тайёрлаган Дилшод Аскаров

#Испания #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.