Ямал гол урди ва сажда қилди, Португалияда «Даллас сериали бошланди»

Шимолий Америкада 23-жаҳон чемпионати учрашувлари давом этмоқда. Ҳали 2-тур давом этмоқда ва фаворитлар ҳақида гапиришга эрта, бироқ ўйин жиҳатдан кучли жамоалар ажралишни бошлади. Испания биринчи турдаги сенсацион дурангдан кейин иккинчи турда Саудияни осонгина енгди. Ўйин тақдири 14 дақиқа ичида ҳал бўлди. Олдинги мундиални мактабда томоша қилган Ямал гол уришни бошлади.

Испания яна доминантлик қилди

Мен ЖЧнинг асосий фаворити Испания дейишда давом этаман. Кабо-Вердега қарши ўйиндан кейин ҳам бу фикрим ўзгармаганди. Ахир испанлар амалдаги Европа чемпиони. Бунақа статусдаги жамоа мундиалнинг ҳар қанақасига фаворити бўлади. Замонамизнинг Висенте дел Боскеси бўлаётган Луис де ла Фуэнте бир неча йиллардан буён ўз услубидан – доминант футбол кўрсатишдан чекинмайди. Еврода бир гуруҳ мактаб болаларини майдонга туширган мураббий кимсан Франция билан ўйинда ҳам шунақа ўйнаган.

Беназир испан футболининг тўпни сақлаб туриш, тинимсиз комбинацион ўйин кўрсатишдек мардонавор анъаналарини давом эттираётган мураббий бренд коучлар қаторига кирмас, лекин футбол нуқтаи назаридан у энг яхшилардан.

Испания Кабо-Верде билан ҳам тўлиқ доминантлик қилган, лекин гол ура олмаганди. Саудия билан ҳам шундай ўйин кўрсатди, испанларда ўйин ўхшамаса, бошқа услубга ўтиш деган тушунчанинг ўзи йўқ. Улар исталган рақибни ўз услубига мослаштиради керак бўлса.

Услуб ўзгармади, лекин мураббий барча чизиқларда ўзгаришлар қилди. Ҳужумнинг икки қанотини ҳам ўзгартирди: Оярсабал ўз ўрнида қолди, қанотларда «вазиятлар кушандаси» Ферран Торрес ва нега ҳужумда ўйнаганини ҳеч ким тушунмаган Гави ўрнига Ямал ҳамда агрессив Алекс Баена тушди. Яримҳимояда ҳам Фабиан Руис ўрнини Дани Олмо эгаллади. Қанот ҳимоясида Лиорентени Педро Порро алмаштирди.

Ўзгаришлар фойда берди, ҳужумда самаралироқ ўйнаган испанлар 15 дақиқа ичида учта гол уриб ташлашди. Ямал мундиаллардаги илк голини урди, унга Оярсабал ассист берди, кейин ўзи ҳам иккита гол урди. Иккинчи бўлим олдидан мураббий Ямал ва Оярсабални кейинги ўйинга асраб, захирага олди. Ахир Уругвайни енгиб биринчи ўринни олмаса, кейинги босқичда Аргентина тушиб қолиши ҳеч гап эмас.

Иккинчи бўлимда испанлар биттагина гол уришди. Кукурелянинг зарбаси рақибга тегиб автоголга айланди. Шу ўринда «Реал» президенти Флорентино Пересга қойил қолиш керак. Испания мундиалга «Реал»дан бирорта футболчи олиб кетмаганди, лекин иккинчи турга келиб «Реал» футболчисининг зарбаси гол бўлмоқда. Перес қўярда қўймай Кукуреляни мусобақа давомида сотиб олди ва энди Испанияда «Реал» футболчиси бор! Перес, шубҳасиз, замонавий футболнинг даҳоси, бошқача бўлиши мумкин эмас. Бу ҳолатга шарҳловчи Ҳасан Турдиалиев ажойиб таъриф берди: Испания «Реал»дан футболчи олмади, лекин «Реал» Испаниядан футболчи олди.

Гуруҳдаги нариги ўйинда Возиня бошчилик Кабо-Верде энди Уругвайдан очко олди. Бу гал африкаликлар 90 дақиқа ҳимояда ўйнамади, ўзига хос қувлашмачоқда кимсан икки карра жаҳон чемпиони Уругвайга енгилмади – 2:2. Охирги турда Саудия ва Кабо-Верде катта эҳтимол плей-офф йўлланмаси учун кураш олиб боради.

«G» гуруҳи менимча, энг зерикарли гуруҳ бўлмоқда. «Дуранглар гуруҳи»да Эрон бу гал Белгияга ютқазмасликни уддалади. Бейронванд энг яхши футболчи бўлгани ким устунлик қилганини кўрсатиб турибди. Учинчи тур олдидан икки очко ёмон эмас, лекин фақат дуранг ўйнаб ҳам гуруҳдан чиқиш қийин масала. Эсингизда бўлса, 2010 йил Янги Зеландия гуруҳдаги уч ўйиннинг барчасида дуранг ўйнаб, турнирда ютқазмаган ягона жамаога айланган, лекин гуруҳда қолиб кетганди.

Айтганча, Янги Зеландия бу гал ҳам «дуранглар гуруҳи»да. Биринчи турда зерикарли ўйин кўрсатган Миср 2-турда Янги Зеландияни 3:1 ҳисобида енгди. Муҳаммад Салоҳ битта гол уриб, битта голли узатма қайд этди. Ҳозирча унинг мундиалдаги натижаси 1+2.

Олмонияда курд қаҳрамон

Биринчи турда Кюрасао дарвозасига гол уравериб зериккан Германия иккинчи турда жиддий қаршиликка учради. Амад Диало бошчилик Кот-д'Ивуар немислардан очко олишига сал қолди. Биринчи бўлимда «Барселона» собиқ футболчиси Франк Кессие Фил суяги қирғоғидан келган жамоасини олдинга олиб чиқди. Немислар бир соат давомида африкаликлар дарвозасига йўл топа олмади.

60-дақиқада туркиялик курдлардан бўлган «Штутгарт» ҳужумчиси Дениз Ундав майдонга тушгач, барчаси ўзгарди. 68-дақиқада Ундав ҳисобни тенглаштирди. Унга афғонистонлик муҳожирлар фарзанди бўлган Надим Амири голли узатма берди. 90+4-дақиқада Ундав ғалаба голини урди. Бу ғалабадан кейин немислар плей-офф йўлланмасини нақд қилди.

Гуруҳдаги иккинчи ўйинда Кюрасао Эквадордан очко олди. Бу ўйинда Кюрасаонинг 37 ёшли посбони Элой Ром 15 та сейв қилиб, қаҳрамон бўлди. Бу бир ўйинда қайд этилган сейвлар сони бўйича ҳам мундиаллар рекорди бўлди. 40 ёшли Возиня барча қари дарвозабонларни илҳомлантириб юборган кўринади. Нестеров ўйнаётган бўлса, биз ҳам олиб кетган бўлардик.

Кечаги куннинг охирги ўйинида Япония Тунис дарвозасига жавобсиз 4 та гол урди. Қитъадошларимиз гуруҳдан чиқиш масаласини деярли ҳал қилди. Японлар билан биринчи турда дуранг қайд этган Нидерландия сардори Виржил ван Дейк японларга тўғри баҳо бериш кераклигини айтди. Унинг фикрича, осиёликлар билан дурангдан кейин жамоани жиддий танқид қилиш тўғри эмас, чунки Япония жаҳон даражасидаги жамоа.

Ван Дейк босчилик нидерландияликлар иккинчи турда Швецияни 5:1 ҳисобида енгди. Шведлар биринчи турда Тунисни худди шундай ҳисобда енгганди. Бу гуруҳда Тунисдан бошқача барчада кейинги босқичга чиқиш имконияти сақланиб қолди.

Вини ҳозирча энг зўр

Биринчи турда кутилмаганда Марокашни енга олмаган Бразилия иккинчи турда Ҳаитини йирик ҳисобда мағлуб этди. Мағрибликларга қарши қийин ўйинда Винисиус Жуниор чиройли гол уриб, Бразилияга очко келтирганди. Иккинчи ўйинда ҳам Вини Бразилиянинг янги етакчиси эканини исботлади. Матеус Кунянинг икки голига ассистентлик қилди, кейин ўзи ҳам гол урди. Вини ҳозирча мундиалнинг энг яхши футболчиси бўлиб турибди, чунки бирор футболчи икки ўйинда ҳам бундай ёрқин футбол кўрсатмади.

Вини энг яхши ҳолатида бўлса, Рафинянинг жароҳат олгани ҳам, Неймар жаҳон чемпионатига олиб келингани ҳам сезилмайди. Ахир Бразилияни бу футболчидан максимал фойдаланишни биладиган Карло Анчелотти бошқармоқда. Папа Карло бор экан, футболчилар фавқулодда хотиржам тортиб қолишади. Чунки майдонда ишлари ўхшамаса, майдон четидаги боболари, албатта, нимадир қилишини билишади. Бундай совуққон мураббий билан Бразилия чинакам қўрқинчли тус олмоқда. Мен Вини ва жамоасидан бу мундиалда кўп нарса кутяпман.

Португалияда можаро

Португалия миллий жамоасида Ўзбекистонга қарши ўйин олдида оддий бир фейк сабаб «Даллас сериали бошланди». Тармоқда Жоао Невешнинг дугонаси экани айтилган қизнинг гўёки мухлис билан ёзишмаси вирус каби тарқалди. Мухлис унга «Йигитингга айт, тўпни Роналдуга оширсин!» деган, қиз эса «Роналдунгга айт, фаолиятини якунласин!» деган гўёки қиз. Аслида бу ёзишма умуман бўлмаган, шунчаки фейк, лекин кўпчилик бунга ишониб Невеш ва унинг дугонасига ҳужум қилишга киришди.

Бу фейк эканидан бехабар Роналдунинг хотини Жоржиня Родригес «Вау, янги авлод ажойиб», деб муносабат билдирди. Роналдунинг аргентиналик хотини бу пости билан «ёнғинга мой сепди», энди кўпчилик бу аслида фейк экани билан қизиқиб ҳам ўтирмай, бечора Невешга ёпишиб кетди.

Хуллас, «душман лагери»да ана шунақа гаплар. Португаллар хотинларнинг деди-дедиси билан овора бўлиб турганда, биз уларни жимгина ютиб олишимиз керак...