«Бирлашиш ғояси совет иттифоқи тикланишидан қўрқув ҳисси билан тўқнаш келмоқда» – Путин янада чуқурроқ интеграцияга қаршилик ҳақида

Россия президенти Владимир Путин постсовет минтақада янада чуқурроқ интеграцияга иқтисодий рақобатчи пайдо бўлишидан манфаатдор бўлмаган ғарблик ҳамкорлар тўсқинлик қилмоқда, деб ҳисобламоқда.

Фото: Алексей Дружинин/РФ президенти матбуот хизмати/ТАСС

У «Москва. Кремль. Путин» дастурига берган интервьюсида бирлашиш ғояси совет иттифоқи ва совет империяси тикланишидан қўрқув ҳисси билан тўқнаш келаётганини айтиб ўтган.

«Ўтмишнинг қандайдир таҳликаси, совет иттифоқи ва совет империясининг қайта тикланишидан қўрқувларини енгиб, саъй-ҳаракатларни бирлаштириш барчанинг фойдасига хизмат қилиши, барибир ўзига йўл очиши муқаррар эканлигини аён бўлиб бормоқда. Бу устунликларни ҳис қилган ҳолда — буни жараённинг барча қатнашувчилари ҳис қилмоқда — биз олдинга қадам ташлаб, илгари ҳаракат қиламиз ва олға интиламиз»,— деган Владимир Путин 2019 йилнинг 1 октябрида ёзиб олинган, бироқ эфирда бугунги кунга келиб янграётган интервьюсида.

Бундан ташқари Путин «яқин-яқингача бизнинг иқтисодий, сиёсий ёки ҳарбий эмас, айнан иқтисодий бирлашмамиз билан ҳаттоки гаплашишни ҳам исташмаган» ўзининг «ғарбдаги ҳамкасбларининг қаршилиги»га эътибор қаратган.

Унинг қайд этишича, собиқ СССР республикалари учун ўзининг рақобатбардошлигини бирлашиш ҳисобига ошириш — «бу мутлақо табиий иш».

«...барча давлатларда рус тилида эркин гаплашишади. Бу жуда катта устунлик. Битта мамлакатдан транспорт, энергетика, алоқа инфратузилмасини умумий мерос қилиб олган биз учун бу интеграциялашув учун яна бир улкан устунлик», деган Россия Федерацияси президенти.

Ўз интервьюсида Владимир Путин Россия бошчилигидаги Евроосиё Иқтисодий Иттифоқи — ЕОИИ ҳақида ҳам гапирган.

Маълумот учун, бугунги кунда ЕОИИга аъзолик масаласи собиқ иттифоқ давлатлари ичида фақат Ўзбекистонда кун тартибида кўриб чиқилмоқда.