Россиядаги коронавирус тарқалган меҳнат муҳожирлари ётоқхонаси эгаси ҳибсга олинди

Россиянинг Ленинград вилояти, Новосергиевка қишлоғидаги ноқонуний ётоқхонада меҳнат муҳожирларининг оммавий тарзда коронавирус юқтириб олиши ҳолати 40 ёшли тадбиркор Артём Б. учун жиноят иши билан якунланди

Фото : KUN.UZ KUNDALIGI /архив

Ишбилармон бинони 4 йил давомида ҳеч ким ижарага олмагани ва коммунал тўловлар туфайли қарзга ботиб кетган. Шундан сўнг, уни меҳнат муҳожирлари учун мўлжалланган ётоқхонага айлантиришга қарор қилган. Аммо бунинг учун ҳеч қаердан рухсат олмаган.

11 апрель куни Роспотребнадзор, Тергов қўмитаси ва полиция ҳамкорлигида ётоқхонада рейд ўтказилди. Текширув давомида санитар шифокорлар 123 нафар меҳнат муҳожирида коронавирус борлигини аниқлашди. Уларнинг орасида ўзбекистонликлар ҳам бўлиши мумкин. Шундан сўнг, беморлар учун ётоқхона ҳудудида 88 ўринга мўлжалланган палаткали госпиталь ташкил қилинди.

Ҳозирги вақтда ётоқхона эгаси Артём Б. ҳибсга олинган. Яқин орада унга айблов эълон қилиниши кутилмоқда. Ҳозирча уни Жиноят кодексининг қайси моддалари билан жавобгарликка тортиш масаласи ҳал бўлмаган.

Меҳнат муҳожирларининг бир қисми «Мега-Дибенко» савдо марказини таъмирлашда ишлаган. Компания вакиллари буни тасдиқлаб, бино ичи дезинфекция қилинганини таъкидлашмоқда. Уларнинг сўзларига кўра, меҳнат муҳожирлари савдо маркази ходимлари ва мижозлари билан яқин алоқада бўлмаган.

Тайёрлаган Сардор Юсупов

#Россия #мигрант #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.