Россияда хорижликларни депортация қилиш 15 июнгача тўхтатилди

Патентлар, меҳнат қилиш учун рухсатнома, визалар, вақтинчалик яшаш рухсатномалари муддати 90 кунга узайтирилади

Фото: Сафрон Голиков / «Коммерсантъ»

Россия хориж фуқароларини депортация қилишни 15 июнгача тўхтатди. Бу ҳақда Россия ИИВ миграция масалалари бўйича бош бошқармаси бошлиғи Валентина Казакова маълум қилди.

"Россия президентининг фармонига мувофиқ, ҳозирда Россия ҳудудида бўлиб турган ва ҳужжатлари муддати тугайдиган фуқароларнинг барча ҳужжатлари амал қилиш муддати 90 кунга тўхтатилади. Яъни 15 мартдан 15 июнгача. Бу дегани, патентлар, меҳнат қилиш учун рухсатнома, визалар, вақтинчалик яшаш рухсатномалари – бу ҳужжатларнинг барчаси 90 кунга узайтирилади", - деди Казакова.

Унинг сўзларига кўра, бу давр мобайнида хорижликларга нисбатан "депортация, мамлакатдан чиқариб юбориш, реадмиссия ёки мамлакатда бўлишини истамаслик борасида ҳеч қандай қарор қабул қилинмайди".

Бундан ташқари, хориж фуқароларидаги мавжуд ҳужжатлар бекор қилинмайди.