ОПЕК иккинчи ярим йилликда бир баррель нефть нархи 40 долларгача кўтарилишини тахмин қилмоқда

ОПЕК 2020 йилнинг икккинчи ярим йиллигида нефтнинг бир баррели нархи 40 доллар атрофида баҳоланади деб ҳисобламоқда. Бу ҳақда Жазоир энергетика вазири Муҳаммад Ақраб маълум қилди. У 2020 йил декабрга қадар ОПЕК конференцияси президенти ҳисобланади.

Унинг сўзларига кўра, кейинги кунларда "бозорлар ижобий сигнал беришни бошлади". Тахминга кўра, май-июнда нефтнинг жаҳон нархи  35 долларгача кўтарилади.

Ақраб ОПЕК+ қарори ҳамда Европа ва Хитойда кўрилган чоралар нархнинг кўтарилишига хизмат қилишини таъкидлади.

Апрель ўрталарида ОПЕК+ мамлакатлари 1 майдан нефть қазиб олишни камайтиришга келишиб олганди. 

20 апрелда жаҳон биржаларида нефть нархининг пастлаб кетиши хом ашё бозорини остин-устун қилиб юборди. Шу куни Кариб денгизи ҳавзаси ҳамда Шимолий Америкада қазиб олинадиган WTI навидаги нефтнинг 1 баррели мутлақо кутилмаган ҳолда -40 долларгача тушиб кетди.

22 апрелга келиб нархлар бироз «ўзига келди». WTI навли нефтнинг бир баррели 11,47 долларга кўтарилди, Brent навли нефтнинг 1 баррели 16 долларга арзонлашди.