«Кўчма лабораторияларга эҳтиёж йўқ» – ССВ вакили коронавирус учун таҳлил олинадиган лабораториялар етарли эканини маълум қилди

– Коронавирусни лаборатор текшириш усуллари – томоқдан суртма олиб текширишда, беморнинг вирусдан аниқ холи бўлганини аниқлаб бера оладими, яъни бу қай даражада ишончли?

– Ўзбекистонда COVID-19 вирусини аниқлаш учун ПЦР (полимераз занжир реакцияси) ишлатилади. Унинг аниқлаш фоизи жуда юқори булиб, 90 фоиздан ошади.

– Карантиндан сўнг ҳам ниқоб тақиш, ҳимоя воситаларидан фойдаланиш давом эттириладими?

– Бу ўша пайтдаги вазиятга ЖССТнинг талаб ва тавсияларига боғлиқ. Масофа сақлаш ва гигиена қоидаларига риоя қилишга одатланиш бундан кейин ҳам, тавсиялар бўлиш бўлмаслигидан қатъи назар давом этса керак.

– Сингапур университетининг Ўзбекистонда коронавирус инфекциясининг тарқалиши жорий йилнинг 24 майида тўхташига оид прогнози қанчалик ҳақиқат?

– Сингапур университети олимлари махсус дастурлар ёрдамида жойлардаги вазиятни ўрганиб, математик модел яратишган. Аммо уларнинг ўзлари ҳам бу математик ҳисоб-китоблар эканлиги ва улар реал ҳаётдан фарқланиши мумкинлигини тан олишган.

– Ҳозирги ҳолатда шаҳардан шаҳарга, тумандан туманга ўтишдаги постларда автомобилларни дезинфекциялаш ишлари тўхтаб турибди. Дезинфекциялаш мажбурияти қолдирилдими?

– Эпидемиологик осойишталик агентлиги қайд этишича, ҳозирги кунда карантин талаблари босқичма-босқич юмшатилиб, вилоятлараро қатновларга рухсат берилди. Аммо дезинфекциялаш тадбирлари бекор қилингани йўқ.

– Бир танишим тест топширибди. Биринчи марта тест топшириш орқали таҳлил натижаси 50/50, яъни аниқ чиқмайди, фақат 14 кунлик кузатувдан сўнг аниқ натижа беради деяпти. Шу ростми?

– Бу нотўғри маълумот. Полимераз занжир реакцияси жуда аниқ жавоб беради. Иккинчи марта зарарланган бемор тузалганини аниқлаш учун анализ такрорланади.

– Исроилда коронавирус текшириладиган будкалар ташкил қилингани ҳақида маълумотлар тарқалди. Бизда ҳам ана шундай тест олиш учун жойлар ташкил этилиши мумкинми?

– Ўзбекистонда коронавирусни аниқлаш учун анализ оладиган лабораториялар етарли миқдорда тайёрланган. Уларда керакли асбоб ускуналар, реактивлар ва ишлайдиган мутахассислар етарли. Шунинг учун кўчма лабораториялар очишга эҳтиёж йўқ.