Япония коронавирусга қарши вакцина ишлаб чиқилишига 800 млн доллардан кўпроқ маблағ ажратади

Япония бош вазири Синдзо Абэ ҳукумат коронавирусга қарши вакцина ишлаб чиқилишига 800 млн доллардан кўпроқ маблағ ажратмоқчилигини маълум қилди.

Фото: TASS/Zuma

Бу ҳақда NHK телеканали хабар берди.

Бу маблағлардан 234 млн долларга яқини Эпидемияларга тайёрлик соҳасидаги инновациялар учун глобал коалиция (CEPI) ва вакцина яратиш устида ишлаётган бошқа халқаро ташкилотларга йўналтирилади. “Зарарланиш хавфи учун чегара йўқ. Жаҳон ҳамжамияти бу инқирозни енгиб ўтиш учун бирлашмоғи лозим”, деб айтган Абэ.

4 май куни телеканал Япония ҳукумати коронавирусга чалинганларни даволашда гриппга қарши “Фавипиравир” (ёки “Авиган”) дори воситасини қўллашга рухсат бермоқчилигини маълум қилган. NHK маълумотларига кўра, бош вазир соғлиқни сақлаш, меҳнат ва фаровонлик вазирлигига бу билан боғлиқ тегишли жараёнларни тезлаштиришни буюрган.

Шунингдек, 4 май куни мамлакатда 8 апрелдан бери амал қилаётган фавқулодда вазият режими 31 майгача узайтирилди.