Халқ демократик партияси Сирдарёга ёрдам жўнатди

Сирдарё вилояти Сардоба туманидаги сув омборида юз берган фалокат оқибатида жабр кўрган юртдошларимизни руҳан қўллаб-қувватлаш, уларга ҳар томонлама ёрдам кўрсатиш долзарб ижтимоий аҳамиятга эга.

Президентимиз бошчилигида бу масалада тизимли чора-тадбирлар амалга оширилмоқда. Хавфли ҳудуддан эвакуация қилинган аҳолига озиқ-овқат ва бошқа энг муҳим воситалар етказиб берилмоқда. Улар тезроқ уйига қайтиши учун барча куч ва имкониятлар сафарбар этилган.

Қийналганларга ҳар томонлама мадад бўлиш, мураккаб кунларда елка тутишга ошиққан ватандошларимиз сафи кундан-кун кенгаяётгани кўнгилни кўтаради. Халқимиз ўртасидаги ҳамжиҳатлик ҳар қандай қийинчиликларни ёнма-ён туриб енгиб ўтишга асос бўлади.

Шунинг учун Халқ демократик партияси дастурий мақсадларига мувофиқ тарзда фалокатдан жабр кўрган сирдарёликларни қўллаб-қувватлашга алоҳида эътибор қаратмоқда.

Сенатор, депутатлар ва эл-юрт ҳурматини қозонган партия фаолларидан иборат ишчи гуруҳлар тузилган. Улар аҳоли билан юзма-юз учрашиб, ижтимоий масалаларни ўрганиб, ҳол сўраб, руҳий мадад беришмоқда. Маҳаллий Кенгаш депутатлари фалокат оқибатларини бартараф этиш билан боғлиқ барча жараёнларда фаол иштирок этишмоқда.

Масалан, С.Муҳаммадиев ўзи раҳбарлик қилаётган Гулистон олимпия захиралари коллежи ётоқхонасида 50 та оила учун ётоқ жойларини ташкил этиб, уларнинг яшаш шароитидан хабардор бўлиб турибди. Ўзбекистон ХДП Сирдарё вилоят кенгаши раиси ўринбосари Б.Эшмирзаев талафотдан азият чеккан оила вакилларини ўз уйига жойлаштирган бўлса, Ж.Аллаярова, Н.Эрматова 10 та оилани ҳомийликка олди.

Партиямизнинг Оқолтин тумани фаоллари Ғ.Аҳмедов, Р.Аҳмедов, Э.Бобоев, Х.Буриева, Д.Баҳромовлар эвакуация қилинган 15 та оилани ҳомийликка олиб, кундалик зарур маҳсулотлар етказиб беряпти. Г.Боймирзаева Ф.Суванов хонадонига келтирилган 36 нафар юртдошимизни озиқ-овқат ва гигеник воситалар билан таъминлаяпти.

Халқ демократик партияси Марказий Кенгаши қийин вазиятга тушиб қолган оилалар учун кўрпа-ёстиқ, кийим-кечак, рўзғор буюмлари ва тозалаш воситалари етказиб берди.

Депутатлар, маҳалла раислари ва фаоллар маҳсулотларни бевосита эҳтиёжманд оилаларга тарқатиб чиқди.

Депутатларимиз, партиямиз фаоллари фалокатдан зарар кўрган оилаларни тизимли қўллаб-қувватлашни, улар билан доимий мулоқотда бўлиб, юзага келган ижтимоий масалаларни мутасадди ташкилотлар билан бирга қисқа вақт ичида ҳал этиб беришни ният қилган.

Халқ бошига бундай синовлар юз йилда, эҳтимол минг йилда бир марта келар. Бир-биримизни эъзозлаб, асраб-авайласак, ҳар қандай синовдан юруғ юз билан чиқамиз.

Халқ демократик партияси
Ахборот хизмати