Чўкаётган аёлни қутқариб қолган ИИБ капитанига муддатидан олдин майор унвони берилди

Ўзбекистон ИИВдан хабар қилишларича, воқеа шу йилнинг 15 апрель куни Хўжайли туманининг Суўенли маҳалласида рўй берган.

«ИИБ ҲПБ профилактика катта инспектори капитан Бийсенбай Қайипназаров ва профилактика инспектори капитан Саламат Утемисовлар кундалик тақсимот бўйича ўзларига бириктирилган «Суўенли» маҳалласи ҳудудида аҳолининг карантин қоидаларга амал қилишини назорат қилиш юзасидан хизмат олиб бораётган пайтда ҳудуддан оқиб ўтувчи «Суўенли» канали бўйида чўкиб кетаётган фуқарони кўриб қолиб, тезкорлик билан амалий ишлар олиб бориши натижасида фуқаро шу туманда яшовчи аёл киши Д.А. ҳаётини сақлаб қолади.

Шундай вазиятда, ўзларининг хизмат вазифаларига сидқидилдан ёндашиб, фуқаро ҳаётини сақлаб қолгани ва фаолияти давомида юқори натижаларга эришгани, Ўзбекистонда кузатилаётган эпидемиологик вазиятда фуқароларни кутиб олиш, муассасаларига жойлаштириш, карантин объектларининг ишончли ҳимояланиши ҳамда ушбу ҳудудларда жамоат тартибини сақлаш ва хавфсизликни таъминлашда сидқидилдан хизмат қилгани учун капитан Бисенбай Қайпназаровга Қорақалпоғистон Республикаси Ички ишлар вазири полковник А.Темирханов томонидан муддатидан олдин «майор» унвони берилиб, ходимларга келгуси хизмат фаолиятида зафарлар тилади», – дейилади хабарда.