ИИВ, Адлия ва Тоғ-кон вазирлиги — давлат бошқарувидаги энг илғор идоралар

Президент иштирокида бўлиб ўтган тадбирда «Ўзбекистон – 2030» стратегиясини амалга ошириш бўйича Адлия вазирлиги энг намунали вазирлик деб топилди. Таъкидланишича, вазирлик қисқа вақт ичида замонавий, очиқ ва рақамли адлия институтига айланди. Айни пайтда 30 та платформа орқали 380 та тўлиқ рақамлаштирилган хизмат кўрсатилмоқда, 780 дан ортиқ хизматдан эса онлайн фойдаланиш имконияти яратилган.

Тоғ-кон саноати ва геология вазирлиги ресурсларни бошқариш бўйича энг намунали вазирлик сифатида эътироф этилди. Қайд этилишича, геология-қидирув ишларида сув сарфи 20 фоизга қисқартирилган, асосий кончилик ускуналарини маҳаллийлаштириш даражаси эса 84 фоизга етказилган.

Ички ишлар вазирлиги давлат хизматларини кўрсатишдаги ижобий натижалари учун энг намунали идора деб тан олинди. Бугунги кунда вазирлик хизматларининг 95 фоизи тўлиқ рақамли шаклда тақдим этилмоқда. Шунингдек, тарқоқ бўлган 72 та маълумотлар базаси ягона «Хавфсиз шаҳар» тизимига бирлаштирилган.

Тадбирда бир қатор давлат хизматчилари ҳам турли номинациялар бўйича ғолиб деб топилди. Президент ғолибларнинг лавозимларини бир поғона ошириш ва уларни раҳбар кадрлар захирасига киритишни таклиф қилди.

Шавкат Мирзиёев келгуси босқичдан бошлаб «Сифатли давлат бошқаруви» дастурида маҳаллий ҳокимликлар ҳам иштирок этишини маълум қилди. Президентга кўра, ислоҳотлар натижаси, аввало, туман ва шаҳар даражасида сезилиши керак.