Эронда бир ойдан кўпроқ вақт ичида энг кўп коронавирусга чалиниш ҳолати қайд этилди

Эронда сўнгги кунда 2,1 мингтадан кўпроқ коронавирусга чалиниш ҳолати қайд этилди. Таъкидланишича, бу мамлакатда 7 апрелдан бери бир кун ичида қайд қилинган энг катта кўрсаткич ҳисобланади.

Фото: Reuters

Шунингдек, 48 та янги ўлим ҳолати қайд этилган.

Айни вақтда Эронда коронавирусга чалинганлар сони 116,6 мингдан кўпроқни ташкил қилмоқда.

Мамлакатда коронавирусга чалинганлар сонининг кескин ортиши бир қатор чекловларнинг енгиллаштирилиши ортида юз берган. Жумладан, ҳукумат масжидлар очилишига рухсат берган, 16 майдан мактаблар очилиши кутилмоқда.

Эрон Яқин Шарқда коронавирус пандемиясидан энг кўп жабр кўрган давлатлардан бири бўлиб қолмоқда. Пандемия бошидан бери мамлакатда коронавирусдан 6902 киши вафот этган.

Дастлаб Эрон ҳукумати аҳолини изоляциялаш бўйича қатъий чоралар кўришни истамаган, бироқ коронавирус тарқалиши кескин авж олиб кетгандан кейин бу стратегиясини ўзгартиришга мажбур бўлган.

Тайёрлаган Шуҳрат Раҳимов

#Эрон #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.