Туркманистон ва Эрон чегарасида поезд ва юк машиналарини дезинфекцияловчи туннеллар ташкил этилади

Коронавирус тарқалиши олдини олиш учун Туркманистон ва Эрон чегараларини кесиб ўтувчи поезд ва юк машиналари учун дезинфекцияловчи туннеллар ташкил этилади. Бу ҳақидаги келишув Ўзбекистон, Эрон ва Туркманистон вакилларининг 12 майдаги музокаралари натижаларига кўра эришилган.

Фото: hydroblaster.com

Бу ҳақида Эроннинг йўл ва шаҳарлар қурилиши вазири Муҳаммад Исломий хабар қилди.

“Биз уч томонлама савдо айирбошлашни тиклаш учун коронавирусни назорат қилиш бўйича қўшма баённомаларга рози бўлдик”, деб келтирган Исломий сўзларини Fars нашри.

10 кун ичида Туркманистон ва Эрон чегаралари ўртасида дезинфекцияловчи механизмлар билан таъминланган 20 метрлик туннеллар барпо этилади. Ўзбекистон Эрондан Туркманистон орқали Ўзбекистонга товарлар транзитини енгиллаштириш учун ушбу механизмга қўшилишга таклиф қилинган.

Туркманистон-Эрон чегараси Эронда коронавирус тарқалиши сабабли февраль охирида ёпилганди. Бу Туркманистонда аксарият Эрондан импорт қилинган мева ва сабзавотлар нархининг кескин ошишига олиб келган.

Тайёрлаган Шуҳрат Раҳимов

#Эрон #Туркманистон

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.