ЖССТ коронавирус пандемиясининг иккинчи тўлқини бўлиши мумкинлигидан огоҳлантирди

Жаҳон соғлиқни сақлаш ташкилоти коронавирус эпидемисининг биринчи тўлқини кузатилган ерларда унинг иккинчи тўлқини бўлиши мумкинлигидан огоҳлантирди.

Фото: REUTERS

Бу ҳақда ЖССТнинг Россиядаги вакили Мелита Вуйнович айтиб ўтди. Шу сабабли, аҳолининг коронавирусга чалиниш хавфи ҳамон мавжуд, шу сабабли эҳтиёткорлик чораларига амал қилиш лозим.

“Бу давлатлар ўзаро бирдам эканликларини билдириш учун бирга югуришлари керак бўлган спринтга ўхшайди. Вирус ҳар бир давлатда мавжуд”, деб айтган Вуйнович.

Мутахассис “Россия 24” телеканали эфирида карантиннинг ўйланмай-нетмай енгиллаштирилиши хавфидан огоҳлантирган. Унинг таъкидлашича, барча фуқаролар хавф ҳали ўтмаганини тушунишлари лозим. Вуйновичнинг айтишича, карантин режимида қолиш осон эмас, бироқ назорат остидан чиқиш ўлим даражасининг ўсишига олиб келиши мумкин.

Сўнгги суткада дунё бўйича коронавирусга чалиниш ҳолатлари 106 мингдан кўпроқни ташкил қилди. ЖССТ раҳбари Тедрос Аданом Гебрейесуснинг таъкидлашича, бу пандемия бошидан бери рекорд кўрсаткич ҳисобланади.

Май ўрталарида ЖССТнинг Европадаги бюроси раҳбари Ханс Клюге Европа давлатлари жорий кузда коронавирус эпидемиясининг янги тўлқинига дуч келишлари мумкинлигини, шу сабабли унга тайёрланиш лозимлигини айтган. Унинг таъкидлашича, Европанинг баъзи давлатларида, жумладан Франция, Британия ва Италияда эпидемия пасаймоқда, бироқ карантин чекловларининг бекор қилиниши шошқалоқ қарор бўлиши мумкин.

#ЖССТ #пандемия

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.