Кечиктирилган дебиторлик қарзлари учун жарималар хатловдан ўтказилади ва қайтарилади

Ҳукумат томонидан Молия вазирлиги ва ДСҚга кечиктирилган дебиторлик қарзлари учун жарима санкциялари билан боғлиқ вазиятни ўрганиб чиқиш топширилди.

Фото: iStock

Эслатиб ўтамиз, товарлар амалда жўнатилган, ишлар бажарилган, хизматлар кўрсатилган кундан бошлаб 90 кун ўтгандан кейин етказиб берилган товарлар, кўрсатилган хизматлар ва бажарилган ишлар учун маблағлар келиб тушмаганлиги муддати ўтиб кетган дебиторлик қарзи деб ҳисобланади (12.05.1995 йилдаги ПФ-1154-сон Фармоннинг 2-банди). Бунинг учун 10 БҲМдан 15 БҲМгача жарима солиниши назарда тутилган (МЖТКнинг 175-м. 3-қ.).

Norma’нинг ёзишича, 2019 йил 1 январдан бошлаб давлат улуши 50 фоиздан кам бўлган ташкилотларда дебиторлик қарзлари юзага келганда, санкциялар қўлланилмайди (30.10.2018 йилдаги ПФ-5564-сон Фармоннинг 1-банди «а» кичик банди 5-хатбошиси). Шу боисдан Молия вазирлиги ва ДСҚ томонидан бир ой муддатда 2018 йил 31 декабрдан кейин қўлланилган жарималар хатловдан ўтказилади.

Хатлов натижаларига кўра:

бир ой муддатда ушбу ташкилотлар томонидан кечиктирилган дебиторлик қарзлари учун тўланган жарима суммалари қайтарилади;

2 ҳафта муддатда хусусий ташкилотларга кечиктирилган дебиторлик қарзлари учун молиявий санкцияларни қўллаш тўғрисидаги суд қарорларини бекор қилиш тўғрисида судларга аризалар берилади.

Ҳужжат 16.05.2020 йилдан кучга кирди.