Хусусий банкларнинг банк бозоридаги улуши бор-йўғи 15 фоизни ташкил этади - Марказий банк

Хусусий банклар сон жиҳатдан кўп бўлса ҳам, айни вақтда хусусий банкларнинг банк хизматлари бозоридаги улуши бор-йўғи 15 фоизни ташкил этади. Бу ҳақда Марказий банк маълумотида айтилган.

“Банк тизимида давлат улушининг юқори миқдорда сақлаб қолиниши ушбу тизимининг умумий ривожланишига ҳамда самарадорлигига салбий таъсир кўрсатади”, - дейилади Марказий банк хабарида. 

Давлат иштирокидаги банкларнинг халқаро молия институтлари кўмагида трансформация қилиниши ва хорижий стратегик инвесторларга сотилиши натижасида:

биринчидан, банкларда корпоратив бошқарув ва риск-менежмент тизимлари такомиллашади, 

иккинчидан, банк тизимига янги технологик ечимлар ва банк ишининг илғор хорижий тажрибаси кириб келади, банкларнинг бизнес-моделлари ўзгариб, уларнинг мижозларга йўналтирилганлик даражаси ошади.

Шу билан бирга, хусусий банклар сонининг кўпайиши банк тизимида рақобат муҳити кучайишига хизмат қилади.

Истиқболда хизматларнинг сифати яхшиланади, нархлари арзонлашади, маҳсулот ва хизматларнинг янги турлари пайдо бўлади, масофавий банк хизматлари кўлами кенгайиб боради, аҳоли ва тадбиркорлар учун қулай шароитлар яратилади, дейилган маълумотда.