NASA фазогирлар билан амалга ошириладиган 9 йил ичидаги илк парвозини қолдирди

АҚШнинг NASA коинот агентлиги 28 майга ўтар кечаси белгиланган 9 йил ичидаги илк бошқарувчили парвозини бироз кейинроққа қолдирди. Парвознинг белгиланган вақтда амалга оширилишига ноқулай об-ҳаво шароити тўсқинлик қилди.

Фото: Bill Ingalls/NASA

SpaceX компаниясининг Crew Dragon фазовий кемасининг Халқаро коинот станциясига парвози стартга 17 дақиқа қолганда қолдирилди. Бу вақтда кемани орбитага етказадиган Falcon 9 ракетасининг биринчи поғонаси керосин ва кислород билан тўлдирила бошланган бўлган.

Аввалроқ космодром ҳудудида кучли шамол бўлиши эълон қилинганди.

Ушбу парвоз фазогирларнинг АҚШ ҳудудидан 2011 йилдан бери амалга ошириладиган илк парвози ҳисобланади.

Crew Dragon’да ХКС томон америкалик фахрий астронавтлар Даглас Харли ва Роберт Бенкен йўл олиши керак эди.

Энди 30 май куни кемани учиришга яна бир бор уриниб кўрилади. Агар бу уриниш ҳам муваффақиятсиз келса, 31 май куни яна бир имконият қолади.

Флорида штатидаги космодромга кема парвози ортидан кузатгани атайлаб келган АҚШ президенти Дональд Трамп ортига қайтиб кетган ва кейинги уринишга ҳам келишини маълум қилган.

Crew Dragon кемаси ва Falcon 9 ракетаси америкалик тадбиркор Илон Маскнинг SpaceX компанияси томонидан ишлаб чиқилган. Кема 2012 йилдан бери ХКСга NASA юкларини етказишда қўлланувчи Cargo Dragon юк кемасининг фазогирлар учун мўлжалланган версияси ҳисобланади. У ишчи режимда 2 нафардан 4 нафаргача фазогирни таший олади. Алоҳида ҳолларда кемага 7 нафаргача фазогир жойланиши мумкин.

АҚШнинг аввалги бошқарилувчи кемаси “Атлантис” шаттли бўлиб, у охирги марта ХКСга 2011 йилда учирилган. Ўшандан бери NASA астронавтларини ХКСга катта ҳақ эвазига Россиянинг “Союз” кемалари етказиб келади.

Агар жорий парвоз муваффақиятли кечса, NASA Crew Dragon’ни ХКСга мунтазам парвозлар амалга ошириш учун сертификатлаши мумкин. Таъкидлаб ўтиш жоиз, март ойида ушбу кема фазогирларсиз коинот станциясига бориб-қайтганди.

SpaceX компанияси келгусида Crew Dragon’дан сайёҳларни орбитага етказишда фойдаланмоқчи.