Мексикада ҳам полиция қўлга олган шахс ҳалок бўлгач тартибсизликлар бошланди

Мексикада полициячилар қўлга олган эркак полиция бўлимида ҳалок бўлгандан кейин оммавий тартибсизликлар бошланди.

Фото: cathkathcatt

Воқеа юз берган шаҳарчада одамлар полиция билан тўқнашувга киришиб, хизмат машиналарига ўт қўйишган ва ҳукумат биноларига бостириб киришган.

Полициячилар намойишчиларга қарши кўзни ёшлатувчи газ қўллашган.

Жованни Лопес исмли қурувчи жамоат жойида ниқобсиз юргани учун 4 июнда полиция томонидан ушланган. Полициячилар уни автозакка тиқиб, ўзлари билан олиб кетишган. Кейинроқ эркакнинг яқинлари уни қидира бошлашган. Полиция бўлимида Лопес шифохонада эканлиги айтилган.

Шифохонада эса эркакнинг яқинларига унинг жонсиз танаси берилган. Эркак жасадининг ёрилиши у бошидан олинган жароҳатдан вафот этганини кўрсатган. Намойишчилар айбдорлар жазоланишини талаб қилишмоқда.

Аввалроқ шундай тартибсизликлар АҚШда афроамерикалик Жорж Флойд полициячилар қўлидан ҳалок бўлгандан кейин бошланганди.