Сергелидан Тошкент марказига аҳоли 15 дақиқада етиб келади, йўл светофорсиз бўлади. Вазир ўринбосари янги лойиҳа ҳақида маълумот берди

Ўзбекистон қурилиш вазирининг биринчи ўринбосари Шерзод Ҳидоятов Сергели туманини Тошкент маркази билан боғлайдиган йўл ва кўприклар лойиҳаси ҳақида батафсил тушунтириб берди.

«Сергели туманида тирбандликнинг олдини олиш, қўшимча йўл ўтказгич лойиҳасини таклиф қилиш учун Туркиядан компаниялар, кучли мутахассисларни чақирдик. 

Туркия компанияси мутахассислари бу лойиҳавий таклифни ишлаб чиқишди. Бунинг энг асосий жиҳати шундаки, Сергели туманидан Тошкент марказига аҳоли 50 дақиқада етиб келаётган бўлса, йўл ўтказгич барпо этилганидан кейин аҳоли 15 дақиқада етиб келади. Бу тирбандликнинг олдини олади, ҳеч қандай тўхтовсиз, светофорларсиз тўғридан-тўғри ҳам Тошкент марказига етиб келади, ҳам бошқа қурилган кўприк, йўл ўтказгичларга уланиб, йўлда давом этиши мумкин.

Президентимиз яна бир топшириқлар бердилар - бу йўл ўтказгични энг замонавий лойиҳавий таклиф ечими билан ишлаб чиқишни ва бунинг икки четида велойўлаклар, фуқаролар пиёда юриши учун мўлжалланган қулай тротуарлар қуришни.

Умуман олганда, бу йўл ўтказгичнинг қуввати бир соатда 3000та автомобилга мўлжалланган. Бир кунда 40 000 автомобиль ўта олади. Усмон Носир кўчасидан бошлаб кўприк қурилади, бу кўприкда автомобиллар тўхтовсиз ҳаракатлана олади. Автомобиллар тўғридан-тўғри янги қурилаётган йўлга, Сергелига қараб юради ва Кичик ҳалқа йўлига ҳам тўхтовсиз ҳаракатланиб ўтиб кета олади, сўнг янги қурилган йўл билан келиб кейинги кўприкка чиқади», - деди Ш. Ҳидоятов.