Африкада жойлашган Бурунди давлатининг президенти Пьер Нкурунзиза 56 ёшида вафот этди. Нкурунзизанинг вафотига юрак хуружи сабаб бўлган.
“Бурунди ҳукумати мамлакат президенти Пьер Нкурунзиза 8 июнда Карузи провинциясидаги шифохонада юрак хуружидан кутилмаганда вафот этганини чуқур афсус билан маълум қилади”, дейилган ҳукумат хабарида.
Бурундида 20 май куни президент сайловлари бўлиб ўтганди. Нкурунзиза унга яна 7 йиллик 2 муддатга сайланишга рухсат берувчи янги конституция ратификациясига қарамай, сайловларда иштирок этишдан воз кечган.
Нкурунзиза мамлакатни 2005 йилдан бери бошқариб келган.
Бунгача мамлакатда президент ваколатлари муддати 5 йилни ташкил қилган ва президент 3 та муддатга сайлана олган. Агар Нкурунзиза сайловларда иштирок этишга рози бўлганда, президент лавозимида 2034 йилгача қолиши мумкин эди.
2020 йилдаги сайловларда Бурундининг ҳукмрон партияси номзоди генерал Эварист Ндайишимийе ғалаба қозонган.
