Йўлларда ётиқ чизиқларни чизишда «термопластик»дан фойдаланиш таклиф қилинди

Автомобиль йўлларида ётиқ чизиқларни чизишда “термопластик”дан фойдаланиш таклиф этилди.

“Менинг фикрим” жамоавий мурожаатлар порталида автомобиль йўлларида ётиқ чизиқларни (разметка) чизишда “термопластик”дан фойдаланиш ҳақида петиция жойлаштирилди.

Қайд этилишича, автомобиль йўлларида ётиқ чизиқлар йўлларда узоқ вақт турмайди, йўл белгилари куннинг кечки пайти кўринмайди. Ҳайдовчиларга бу талайгина муаммоларни туғдирмоқда. Бунинг сабаби сифатсиз бўёқларнинг қўлланилиши ва йўл белгиларининг нур қайтариш хусусиятининг пастлигидир.

“Ётиқ чизиқларни чизишда ҳозирда қўлланиб келинаётган сифатсиз бўёқлардан воз кечиб дунёда кенг қўлланилаётган қуйма “термопластик”ни ишлатишни кенг йўлга қўйиш айни муддао. Термопластикнинг йўлга чизилиш технологияси қийин эмас, унинг таркибида махсус нур қайтарувчи кукунлар ҳам мавжуд.

Йўл белгиларига келсак, уларни барчасини сифатли нур қайтарувчи қоплама билан қоплаш зарур. Зеро, бу борада юртимизда мутахассислар ҳам йўқ эмас ва кўп маблағ талаб этмайди”, - деб ёзади мурожаат муаллифи.

Юқоридагиларни инобатга олган ҳолда, автомобиль йўлларида ётиқ чизиқларни (разметка) чизишда “термопластик”дан фойдаланиш таклиф қилинган.

#мурожаат #йўл #термопластик