Вақтинча олиб кириш тўғрисидаги конвенцияни қўллаш тартиби тасдиқланади 

Ўзбекистон Республикаси Давлат божхона қўмитасининг “Вақтинча олиб кириш тўғрисидаги конвенцияни (Истанбул, 1990 йил 26 июнь) қўллаш тартиби тўғрисидаги низомни тасдиқлаш ҳақида”ги қарори лойиҳаси эълон қилинди.

Низом вақтинча олиб кириш тўғрисидаги Конвенцияга (Истанбул, 1990 йил 26 июнь) ва Ўзбекистон Республикасининг Божхона кодексига мувофиқ давлат божхона хизмати органлари томонидан А.Т.А карнетини қўллаган ҳолда “вақтинча олиб кириш” ва “вақтинча олиб чиқиш” божхона режимларига жойлаштирилган товарларга нисбатан божхона операциялари ва божхона назоратини амалга ошириш тартибини белгилайди.

Қайд этилишича, А.Т.А карнети божхона декларациясига тенглаштирилган, товарлар (шу жумладан транспорт воситалари)ни идентификациялашга имкон берадиган ва божхона тўловларини тўлашнинг халқаро миқёсдаги кафолатини ўз ичига олган халқаро божхона ҳужжатидир.

А.Т.А карнетини қўллаган ҳолда божхона операциялари Конвенциянинг, “Вақтинчалик олиб кириш ҳужжатлари тўғрисида” А-илованинг ва Конвенциянинг қуйидаги иловалари шартларидан бирига риоя қилинганда божхона тўловларидан тўлиқ шартли равишда  озод қилинадиган товарларга нисбатан амалга оширилиши мумкин:

В. 1-илова. «Кўргазмалар, ярмаркалар, конференциялар ёки шу каби тадбирларда намойиш қилиш ёхуд фойдаланиш учун товарлар тўғрисида»;

В. 2-илова. «Профессионал асбоб-ускуна тўғрисида»;

В. 3-илова. «Тижорат операцияси муносабати билан олиб кирилган контейнерлар, поддонлар, ўрамлар, намуналар ва бошқа товарлар тўғрисида»;

В. 5-илова. «Таълим, илмий ёки маданий мақсадларда олиб кирилган товарлар тўғрисида»;

В. 6-илова. «Саёҳатчиларнинг шахсий буюмлари ва спорт мақсадларида олиб кирилган юкларга тегишли илова».

А.Т.А карнети божхона органлари томонидан божхона декларацияси ва божхона тўловларини тўлашнинг халқаро миқёсдаги кафолати сифатида қабул қилиниши мумкин, яъни божхона органлари олдидаги мажбуриятнинг бажарилишини кафолатлаши мумкин, агар унда кафолатловчи уюшма ва халқаро тизимнинг номи кўрсатилган бўлса ҳамда у берилаётган уюшма, А.Т.А карнетининг эгаси томонидан белгиланган тартибда тўлдирилган  ва олиб чиқаётган (экспорт қилувчи) мамлакатнинг божхона органи томонидан белгиланган тартибда расмийлаштирилган бўлса.

А.Т.А карнетини қўллаган ҳолда расмийлаштириладиган товарлар учун вақтинчалик олиб кириш муддати товарларни Ўзбекистон Республикасига олиб киришда Ўзбекистон Республикасининг давлат чегараси орқали ўтиш пунктида божхона органи томонидан А.Т.А карнети қабул қилинган кундан бошлаб ушбу товарларни амалда олиб чиқиб кетилган кунгача ҳисобланади.

А.Т.А карнетини қўллаган ҳолда олиб кирилган товарларни қайта олиб чиқиш мажбурияти улар Ўзбекистон Республикасидан амалда олиб чиқиб кетилган пайтдан бошлаб бажарилган ҳисобланади.Конвенцияга мувофиқ божхона органларининг рухсати билан Божхона кодексида белгиланган тартибда “вақтинча олиб кириш” божхона режимини тугаллашнинг бошқа усулларига йўл қўйилади. 

А.Т.А карнетини қўллаган ҳолда Ўзбекистон Республикасига вақтинча олиб кириладиган товарларга нисбатан қуйидагилар билан боғлиқ божхона операциялари амалга оширилади:

товарларнинг Ўзбекистон Республикасига келиши ва Ўзбекистон Республикасининг давлат чегараси орқали ўтиш пунктида жойлашган божхона органида А.Т.А карнетини қўллаган ҳолда “вақтинчалик олиб кириш” божхона режимига жойлаштирилиши;

товарларни А.Т.А карнетини қўллаган ҳолда ички божхона органида “вақтинча олиб кириш” божхона режимига жойлаштирилиши;

товарларни А.Т.А карнетини қўллаган ҳолда божхона органида “реэкспорт” божхона режимига жойлаштирилиши;

товарларни А.Т.А. карнетини қўллаган ҳолда олиб кириш божхона органидан олиб чиқиш божхона органигача ташиш учун “божхона транзити” божхона режимига жойлаштирилиши;

товарларни А.Т.А карнетини қўллаган ҳолда ички божхона органидан Ўзбекистон Республикасидан чиқиб кетиш жойигача ташиш зарурати бўлганда    товарларни “божхона транзити” божхона режимига жойлаштирилиши;

Ўзбекистон Республикасининг давлат чегараси орқали ўтиш пунктида жойлашган божхона органида “реэкспорт” божхона режимига жойлаштирилиши билан “вақтинча олиб кириш” божхона режими амал қилишининг тугалланиши;

Божхона органлари А.Т.А карнетини қабул қилиб олганда А.Т.А карнетининг тўлдирилганлигини А.Т.А карнетидан фойдаланишнинг белгиланган қоидаларига мувофиқлигини текширади. Бунда Конвенцияга аъзо мамлакатларнинг уюшмалари томонидан берилган А.Т.А карнети муқовасининг устки қисмида А.Т.А карнети қабул қилиниши мумкин бўлган мамлакатлар кўрсатилиши лозим, ушбу мамлакатларнинг кафолатловчи уюшмалари номлари ёки божхона ҳудудлари А.Т.А карнетининг охирги яшил бети орқа томонининг юқори бандида кўрсатилиши керак.

А.Т.А карнетининг амал қилиш муддати уюшма томонидан берилган кундан бошлаб бир йилдан ошмаслиги лозим.