АҚШ «Ал-Қоида» жангариларига қарши тиғли «ниндзя-бомба» ракетасини қўллади

АҚШ қуролли кучлари “Ал-Қоида” террорчилик ташкилоти жангариларига қарши тиғлар (лезвиялар) билан қуролланган “ниндзя-бомба” - Hellfire R9X’ни қўллади. Ракетанинг “ниндзя-бомба” деб аталишига сабаб, у билан зарба беришда япон ниндзялари каби тиғли қурол қўлланади. 

The New York Post нашрининг хабар беришича, 14 июнда террорчиларнинг йўлтанламаси Сурия шимолида пайқалгач, унга янги турдаги ракета билан зарба берилган. Машинада “Ал-Қоида”нинг икки қўмондони – Қассам ул-Урдиний ва Билол ал-Санъаний бўлган. Уларнинг иккиси ҳам йўқ қилинган. Шу билан бирга ракета ҳужуми вақтида автомобилга деярли ҳеч нарса қилмаган: унинг қорайтирилган ойналари ва қопламаси бутун қолган, фақатгина томига шикаст етган.

Таъкидланишича, ракета 45 кг.га яқин келади. У парвоз вақтида портламайди, бунинг ўрнига нишонга тегиш вақтида ундан 6 та тиғ учиб чиқади. “Ракетанинг шикаст етказиш радиуси кичик бўлиб, у етказиладиган зарарни чеклаш имконини беради”, деб айтган Демократияни ҳимоялаш жамғармаси илмий ходими Фокс Беннам Талеблу. У бундай қурол террорчиларга қарши курашда портловчи қурилмали анъанавий ракеталардан кўра тобора муҳимроққа айланаётганини айтган.     

2011 йилда Марказий разведка бошқармаси ва АҚШ мудофаа вазирлиги Hellfire R9X ракетасини ишлаб чиқишни бошлаган. Кўп йиллар давомида янги ракета ҳақида маълумот сир сақланган.

Январда Афғонистонда “Толибон” ҳаракати етакчиларидан бирини бартараф этишда “учар тиғ” деб номланувчи тиғли AGM-114R9X ракетаси қўллангани маълум қилинган. Таъкидланишича, ушбу ракета анъанавий жанговар қисм ўрнига 4-6 та қиличсимон тиғ билан жиҳозланган бўлиб, улар ракетанинг бевосита нишонга тегиши олдидан очилади.