Миробод туманида ёшлар ўртасида юзага келган келишмовчилик бўйича расмий маълумот берилди

Тошкент шаҳар ИИББ Миробод туманида рўй берган ҳодиса ҳақида маълумот берди.

Фото: Ижтимоий тармоқлар

Интернетда ёшлар ўртасидаги келишмовчилик видеоси тарқалди, унда бир томон бошқаси минаётган машинага яқинлашиб, ундан чиқишни талаб қилиб автомобиль корпусини тепгани кўринади.

Пойтахт ИИББ хабарига кўра, видеодаги ҳодиса 21 июнь куни тахминан соат 21:15да Миробод тумани Истиқбол кўчасида рўй берган. 23 ёшли А.Д. “Нексия-3” русумли автомобилда 22 ёшли Г.А. билан бирга бўлган. Уларнинг ёнига бир неча киши келиб, машинадан чиқишни талаб қилишган, рад жавобини эшитгач эса машинани тепа бошлашган.

Ушбу ҳудудда хизмат олиб борган ППХ ходимлари 24 ёшли У.М. ва 18 ёшли Ў.Ж.ни аниқлаб, қўлга олишди. Қонуний чора кўрилиши учун ёшларни холислар иштирокида ва ҳодиса гувоҳлари билан бирга Миробод тумани ИИО ФМБ 2-сон ички ишлар бўлимига олиб келишган. У ерда маълум бўлишича, ёшлар орасидаги келишмовчилик бир неча кундан буён давом этиб келган.

Аниқланишича, ҳодиса иштирокчилари илгарироқ телефон орқали жанжаллашиб, учрашишга келишганлар. Учрашув вақтида юзага келган келишмовчилик тасвирга олиниб, интернетга жойланган. Яқин атрофда хизмат қилиб юрган ППХ ходимлари келишмовчилик иштирокчиларини воқеа жойида қўлга олишди.

Ҳозирги вақтда А.Д.нинг аризаси бўйича текширув олиб борилмоқда.

#Миробод #ИИБ