Fujitsu компанияси офисларининг ярмини ёпади ва 80 минг ходимини масофадан ишлашга ўтказади

Япониядаги энг йирик иш берувчилардан бири, Fujitsu компанияси пандемиядан сўнг ижарага олинган офислари майдонини 50 фоизга қисқартириш ва 80 минг нафар ходимини масофадан ишлашга ўтказишни режалаштирмоқда, деб ёзади Bloomberg.

Компаниянинг билдиришича, Work Life Shift дастури жамоаларга «янгича тарз»га кўникишга ёрдам беради. Ходимлар қаердан: уйдан, йирик корпоратив марказ ёки компания филиалларидан биридан туриб ишлашни ўзлари танлайди. Масофадан ишлаш фабрикада ишлайдиганларга татбиқ этилмайди.

Fujitsu ишлашнинг масофавий шакли ходимларнинг иш самарадорлигини оширади деб ҳисобламоқда.

Ходимлар уйларида ишлаш шароитини яратишлари учун Fujitsu уларга ҳар ойда 5 минг иен (46 доллар) тўлайди. Улар пандемиядан олдин йўлкира учун устама олишарди.

Fujitsu Япониядаги энг йирик иш берувчилар рейтингида 17-ўринда туради. Bloomberg агентлигининг маълумот беришича, компанияда 130 мингга яқин киши ишлайди.