Миллий масс-медиани қўллаб-қувватлаш ва ривожлантириш жамоат фондига янги директор тайинланди

Собиқ теннисчи Александра Колесниченко Миллий масс-медиани қўллаб-қувватлаш ва ривожлантириш жамоат фондининг янги директори этиб тайинланди.

Фото: Facebook /massmediafond

«Александра Колесниченко Миллий масс-медиани қўллаб-қувватлаш ва ривожлантириш жамоат фонди директори этиб тайинланди», дея хабар берди фонд матбуот хизмати.

Тайинловга қадар у Президент администрацияси ҳузуридаги Ахборот ва оммавий коммуникациялар агентлиги Ахборот соҳасини ривожлантиришни мониторинг қилиш бўлими бошлиғи лавозимида ишлаган.

Маълумот учун, Александра Колесниченко – спорт устаси, Федерация Кубогида Ўзбекистон терма жамоаси сафида иштирок этган. 2009 йилда ITF рейтингида 577-ўринга кўтарилган. 2012 йилда Олмаотадаги менежмент университетини тамомлаган, 2016 йилда Туркиядаги Боғчашеҳир университетида PR йўналишида бакалавр даражасини олган.

Эслатиб ўтамиз, 2020 йил январидан буён Миллий масс-медиани қўллаб-қувватлаш ва ривожлантириш жамоат фонди директори сифатида ишлаб келган Хушнудбек Худойбердиев 1 июль куни ЎзА бош директори ўринбосари этиб тайинланганди.