Кучли ёғингарчилик Тожикистон шимолидаги иккита туманга жиддий зарар етказди

25-26 июль кунларида ёғиб ўтган кучли ёмғир Тожикистон шимолидаги Сўғд вилоятининг иккита туманига жиддий зарар етказган.

Фото: Тожикистон фавқулодда вазиятлар қўмитаси

Шаррос қуйган ёмғирдан сўнг пайдо бўлган сув тошқинлари оқибатида Деваштич ва Айний туманларидаги экин майдонлари, йўллар, кўприклар ҳамда аҳоли турар жойларини сув босган.

Жумладан, 25 июль куни кечки пайт ёққан кучли ёмғирдан сўнг содир бўлган сув тошқинлари Деваштич туманидаги Угук ва Овчи қишлоқларидаги 16 гектар ер майдонидаги экинларни сув босишига сабаб бўлган, бешта кўприкни, беш километрлик магистрал йўлларни, 14 километрга яқин суғориш тармоқларини вайрон қилган. Шунингдек, мазкур қишлоқларда маҳаллий аҳолининг уй-жойларига жиддий зарар етган.

26 июль куни Айний туманида содир бўлган сув тошқини эса Сўғд вилоятини пойтахт Душанбе шаҳри билан боғлайдиган асосий йўлга зарар етказиб, йўл ёпилиб қолган. Йўлсозларнинг бир соатлик уринишларидан сўнг Хўжанд-Душанбе магистрал йўлидаги тошқин зарарлари бартараф этилган ва йўл қатнов учун очилган.