Норбоева: «Давлат органлари вакилларининг баъзида билиб-билмай айтган гап-сўзлари ёки хатти-ҳаракатлари рейтинглардаги ўрнимизга салбий таъсир қилади»

Олий Мажлис Сенати раиси Танзила Норбоева мазкур фармон ижросини таъминлаш, мамлакатнинг халқаро рейтинг ва индекслардаги ўрнини мустаҳкамлаш борасида қилинаётган ишлар хусусида ўз фикрини билдирди.

Унинг айтишича, халқаро рейтинг ва индекслардаги мамлакат ўрнининг яхшиланиши кўп жиҳатдан қабул қилаётган қонунларнинг жойлардаги ижросига боғлиқ. Халқаро рейтинг ва индекслар билан ишлаш мамлакат учун буткул янги йўналиш ҳисобланади. 

Норбоева вазирлик ва идоралар, суд ва прокуратура органлари, маҳаллий ҳокимликлар бунга қай даражада тайёр экани ҳақида гапирди:

“Албатта, бу кўп вақт сарфланадиган, прогрессив билимларни талаб этувчи янги жараёнлардан бири. Бу, шубҳасиз, масъул давлат органларининг ўзларига бириктирилган халқаро рейтинг ва индекслар методологиясини изчиллик билан ўрганиш, уни тўғри талқин қила олган ҳолда амалиётга татбиқ эта олиш, халқаро рейтинг ва индексни берувчи ташкилот билан алоқаларни ўрната олиш билан боғлиқдир.

Очиғи, барча вазирлик ва идоралар, айниқса, жойлардаги ҳокимликлар ёки парламент аъзоларининг барчаси ҳам масаланинг туб моҳиятини тўла англаб етди, деб айтиш мушкул. Юқорида айтганимдек, рейтинг ва индекслар жойлардаги вазиятга боғлиқ, қонунларнинг ижросига боғлиқ. Минг афсуски, жойлардаги ҳокимликлар ёки давлат органлари вакилларининг баъзида билиб-билмай айтган гап-сўзлари ёки хатти-ҳаракатлари рейтинг ва индекслардаги ўрнимизга салбий таъсир қилади.

Шу ўринда барча раҳбарлар, улар қайси даражадаги раҳбар бўлишидан қатъи назар, ўз ҳаракатларини қонунларда белгиланган тартибда амалга оширишлари зарур эканини яна бир карра таъкидламоқчиман. Одамлар билан мулоқотларда эса инсон шаъни ва қадр-қиммати ҳурмат қилиниши шарт.

Ҳар бир тизимда ишларимизни самарали ташкил этиш мақсадида барча вазирлик ва идораларда халқаро рейтинг ва индекслар билан ишлаш бўйича таркибий бўлинмалар ташкил этилишига эришдик. Бу эса ишимизни анча осонлаштиради. Ажратилган алоҳида ходимлар доимий равишда ўзларининг вазирлиги ёки идораси масъул бўлган халқаро рейтинг ва индекс бўйича иш олиб боради.

Халқаро рейтинг ва индексларнинг аҳамияти, олдимизда турган устувор вазифаларни белгилаш, рейтинг агентликларининг методологияларини ўрганиш мақсадида маҳаллий ҳокимликлар ҳамда вазирлик ва идоралар масъуллари учун махсус тренингларни бошладик.

Шу билан бирга, энг асосий ишимиз қонунлар ва бошқа норматив-ҳуқуқий ҳужжатларнинг амалдаги ижросини, бир сўз билан айтганда, қонун устуворлигини таъминлашдир. Бу борада биз парламент ва жамоатчилик назоратини қатъий йўлга қўйишга киришдик ва, албатта, ижобий натижаларга эришамиз”, - деди Сенат раиси.

Шунингдек, унинг сўзларига кўра, сиёсий-ҳуқуқий рейтинг ва индексларда мамлакат ўринлари нисбатан қуйи поғоналардадир.