«Uzbekistan Research Online» платформасида чиққан инглиз тилидаги мақолалар хорижий илмий нашрлардаги мақолаларга тенглаштирилади

Бу ҳақда вазирлик матбуот хизмати вакили Баҳриддин Шайвалиев Kun.uz’га маълум қилди.

Унга кўра, Олий ва ўрта махсус таълим вазирлиги ҳамда Нидерландиянинг «Elsevier» компанияси ўртасидаги ҳамкорлик бўйича 2018 йилдан буён «Илм-фан – 2020» дастури амалга ошириб келинмоқда. 

Шу лойиҳа доирасида ишлаб чиқилган «Uzbekistan Research Online» рақамли платформасидаги журналларда инглиз тилида эълон қилинган мақолалар эндиликда хорижий илмий нашрларда чоп этилган илмий мақолаларга тенглаштирилмоқда.

«Бу бўйича эса Ўзбекистон Республикаси Вазирлар Маҳкамаси ҳузуридаги Олий аттестация комиссияси Раёсатининг 2020 йил 30 июлдаги қарори қабул қилинди. 

Эндиликда «Олий малакали илмий ва илмий-педагог кадрлар ихтисосликлари рўйхатида»ги фан тармоқлари бўйича Digital Commons платформаси негизидаги «Uzbekistan Research Online» рақамли платформасига киритилган республика олий таълим муассасаларининг 41 та журналида етакчи хорижий олим-мутахассислар тақризидан ўтказилган ҳолда инглиз тилида чоп этилган мақолалар, диссертациялар асосий илмий натижаларини чоп этиш тавсия этилган хорижий илмий нашрларда эълон қилинган илмий мақолаларга тенглаштирилади», – дея Шайвалиевнинг сўзларини келтирмоқда Kun.uz мухбири.

Таъкидланишича, бу ўзгариш эндиликда ёш олим ва тадқиқотчиларга ўз илмий ишлари натижаларини эълон қилишда тўқнаш келадиган қийинчиликларни бартараф этишда катта ёрдам бўлади.

Шунингдек, ОТМлар илмий салоҳиятини ошириш, Ўзбекистондаги илм-фан ютуқларини жаҳон илмий ҳамжамиятига тақдим этиш ва халқаро илмий ҳамкорликни ривожлантиришга хизмат қилади. 

Маълумотларга кўра, «Uzbekistan Research Online» платформасида Ўзбекистондаги ОТМларининг 41 та илмий журнали бирлаштирган бўлиб, унда икки марта аноним рецензиядан ўтказиш (double-blind peer review) конфигурациясини қўллаш имкони мавжуд ва халқаро стандартларга жавоб беради.