Эрдўған Туркия учун “янги даврни очадиган” янгилик ҳақида маълум қилишини айтди

Haber7 нашрининг ёзишича, Эрдўған бу ҳақда 19 августда Анқарада қуёш панеллари ишлаб чиқариш бўйича завод очилиши вақтида маълум қилган. Унинг бу баёноти Туркияда шов-шув кўтарган.
 
Барчани жума куни қандай хушхабар маълум қилиниши мумкинлиги ўйлантириб қўйган. Ижтимоий тармоқлар фойдаланувчилари бу борада ўз тахминларини билдиришга тушиб кетишган, баъзи оммавий ахборот воситалари эса бу хушхабар Туркия Қора ёки Ўрта ер денгизида нефть ва газ топган бўлиши мумкинлиги билан боғлиқлигини таъкидламоқда. Яна бошқа бир тахминларга кўра, Эрдўғаннинг янгилиги коронавирусга қарши вакцина ишлаб чиқилиши билан боғлиқ бўлиши мумкин.

Президентнинг ушбу “сирли” баёноти биржада нефть-кимё компаниялари акциялари нархининг қисқа вақт ичида кескин кўтарилиб кетишига олиб келган.

Туркиянинг Энергетик иқтисодиёт ассоциацияси раҳбари Гюркан Кумбарўғлунинг таъкидлашича, Ўрта ер денгизи ҳам, Қора денгиз ҳам нефть ва газга бой. “Фикримча, янги кон ё Қора денгизнинг ғарбида, ёки Ўрта ер денгизининг шарқида очилган”, деб айтган Кумбарўғлу.

Унинг таъкидлашича, одатда турли давлатлар янги конларни излашда хорижий энергетик компанияларни таклиф қилади, қазиб олинувчи газ ва нефтнинг қанча қисмига эгалик қилиш бўйича келишувлар тузади. Бироқ Туркия Ўрта ер ва Қора денгизларида энергия ресурсларини қидириш ишларини ўз кемаларини қўллаган ҳолда миллий компания орқали бошлаган. Кумбарўғлунинг айтишича, айнан шу муваффақият гарови ҳисобланади.   

Мутахассис эҳтимолий коннинг захиралари бўйича ўз прогнозини бериб, ушбу конда ва унга ёндош ҳудудларда камида триллион кубметр газ бор бўлиши мумкинлигини тахмин қилган. Йилига 50 млрд кубметр газ истеъмол қилувчи Туркия учун бу узоқ йилларга етувчи “хазина” ҳисобланади.

“Агар Туркия шундай энергия манбайини топган бўлса, унда жуда улкан имкониятни қўлга киритган бўлади. Европага газ экспорт қилиш ҳам мумкин бўлади. Туркия бунинг эвазига энергия ресурслари экспортчисига айланиши мумкин”, деб қўшимча қилган мутахассис.