Коммунал соҳа билан боғлиқ мурожаатлар сони кескин ортган – Рақобат қўмитаси

Рақобат қўмитаси ўтказган ўрганишлардан маълум бўлишича, мобил алоқа абонентларидан энг кўп қўнғироқлар электр тармоқлари, газ ва сув таъминоти ва хизматларнинг бошқа ҳаётий муҳим бўғин рақамларига амалга оширилган.

Қайд этилишича, умумий ўртача кутиш давомийлиги айрим ҳолатларда 10-30 дақиқагачани ташкил этган.

Шунингдек, ўрганишлар таҳлили кўрсатишича, коммунал соҳа билан боғлиқ мурожаатларнинг 80-90 фоиздан ортиғи қўмитанинг 1159 ишонч рақами орқали қабул қилинган ва уларнинг сони қуйидаги тарзда кескин ортиб борган:

газ таъминоти бўйича - 4,5 баробар;

маиший чиқинди хизматлари бўйича - 2,4 баробар;

ичимлик суви ва қурилиш хизматлари бўйича - 1,2 баробар.

Бундан ташқари, хизмат кўрсатувчи ташкилотлар алоқа марказларида фаолиятни тартибга солувчи норматив-ҳуқуқий ҳужжат мавжуд эмаслиги, бу эса жисмоний ва юридик шахслар тегишли ишонч телефонларидан тўлиқ ва самарали фойдалана олмаслиги ҳамда кўплаб вақтини йўқотаётган фуқароларнинг кайфиятига салбий таъсир кўрсатиб, муаммоларини тўғридан-тўғри, қисқа вақтда ечим топишига тўсқинлик қилаётгани аниқланди.

Юқоридагиларга асосан, Рақобат қўмитаси томонидан истеъмолчилар ҳуқуқларини самарали ҳимоя қилиш, уларнинг беҳуда йўқотган вақтларини қадрлаш, хизмат кўрсатиш корхоналари қисқа рақамига ишончини ошириш мақсадида ишонч телефонларидаги техник ва ташкилий муаммоларни бартараф этиш юзасидан ишлаб чиқилган таклифлар Рақамли технологиялар вазирлигига юборилди.

Жумладан, алоқа марказлари фаолиятини баҳолаш тартибини аҳоли билан ишловчи барча ташкилотларга татбиқ этиш, камчиликлар учун аниқ жавобгарлик белгилаш ҳамда натижаларни очиқ эълон қилиб бориш таклиф этилмоқда.