Бўстонлиқ туманида “Бахт” спорт-соғломлаштириш мажмуаси фойдаланишга топширилди

Чимён қишлоғида бунёд этилган мазкур мажмуада аҳоли учун соғломлаштириш ва дам олиш тадбирлари ташкил этилади. Шунингдек, бу ерда спорт, кўнгилочар ва тантанали маросимларни ташкил этиш ва ўтказиш бўйича ҳам хизматлар кўрсатилади. Бу ҳақда Давлат божхона қўмитаси ахборот хизмати хабар бермоқда.

Таъкидлаш жоизки, сиҳатгоҳ Чимён тоғ тизмасининг жанубий ёнбағирларида жойлашганлиги сабабли, атмосфера босими нисбатан паст ва ҳавонинг кислород ва ультрабинафша нурлари билан тўйинганлиги юқори нафас йўллари ва асаб тизими касалликларини даволаш учун ҳам жуда фойдали.

Умумий майдони 6 гектарни ташкил этувчи мажмуа ўзида барча қулайликларга эга бўлган 15 та оилавий коттедж ва 12 та дам олиш хоналарини қамраб олади. Шунингдек, бу ерда очиқ ва ёпиқ сув ҳавзаси, замонавий жиҳозланган спорт майдончаси, болалар ўйингоҳи ҳам ташкил қилинган.

Йилнинг тўрт фаслида ўз кўркамлигини йўқотмайдиган манзарали ва мевали дарахтлардан иборат сўлим боғ, табиатнинг гўзал манзараси бу ерга дам олиш учун келган меҳмонлар ва беморлар соғлиғини тезда тикланиши ва уларнинг ажойиб дам олишлари учун кўмаклашади.

Сиҳатгоҳда юқори даражадаги сифатли хизмат кўрсатиш тизими йўлга қўйилган бўлиб, бу эса юртдошларимизнинг мароқли дам олишларига хизмат қилади.