Президент Мустақиллик байрами арафасида 113 маҳкумни афв этди

Фармонга мувофиқ, Ўзбекистон Республикаси Конституциясининг

93-моддаси 23-бандига асосан содир этган жинояти учун жазони ижро этиш муассасаларида жазо ўтаётган ҳамда қилмишига чин кўнгилдан пушаймон бўлган ва тузалиш йўлига қатъий ўтган 113 нафар фуқаро афв этилди.

Афв этилган шахсларнинг 5 нафари асосий жазодан озод этилди, 53 нафари жазони ўташдан муддатидан илгари шартли озод қилинди,

15 нафарининг озодликдан маҳрум этиш жазоси енгилроқ жазо билан алмаштирилди.

Шунингдек, 40 нафар шахсларга тайинланган озодликдан маҳрум этиш жазосининг муддатлари қисқартирилди.

Афв этилганларнинг 1 нафари 60 ёшдан ошган эркак, 2 нафари чет давлат фуқароларидир. 113 кишидан 105 нафарини тақиқланган ташкилотлар иштирокчилари ташкил этади.

«Фармон ижроси юзасидан афв этилган шахсларни оиласи ва яқинлари бағрига қайтариш, ижтимоий ҳаётга мослашиб, фойдали меҳнат билан шуғулланишлари, соғлом турмуш тарзини йўлга қўйиб, жамиятда муносиб ўрин топишлари учун уларга кўмак бериш бўйича масъул вазирлик ва идораларга тегишли топшириқлар берилди», – дейилади расмий хабарда.

Эслатиб ўтамиз, шу йил 5 февралда 58 нафар, 6 мартда 83 нафар, 21 майда 258 нафар маҳкум президент томонидан афв этилган эди.