Ҳиндистон чегарадаги тўқнашув сабабли Хитойнинг 118 та дастурини блоклаб қўйди

Ҳиндистон ўз ҳудудида Хитойнинг 118 та дастурини блоклаб қўйди. Ҳукуматнинг фикрича, ушбу дастурлар миллий хавфсизликка таҳдид солади. Тақиқланган дастурлар орасида PUBG Mobile, VPN for TikTok, Baidu ва бошқалар бор.

Фото: KUN.UZ

Таъкидланишича, PUBG Mobile дастурининг Ҳиндистондаги ойлик аудиторияси 40 млн кишини ташкил қилади.

Июнда маҳаллий ҳокимият Хитойнинг 59 та дастурини, жумладан TikTok, WeChat, Weibo’ни тақиқлаб қўйганди. Ўшанда бу дастурларнинг Ҳиндистон суверенитети ва яхлитлигига зарар етказиши айтилган.

Ҳиндистон ҳукумати бундай қарорни Хитой билан геосиёсий зиддиятлар ортида қабул қилган. Июнь бошида чегарада икки давлат чегарачилари иштирокида юз берган муштлашувда 20 ҳинд ҳарбийси ҳалок бўлган.

31 августда Ҳиндистон мудофаа вазирлиги чегара олдида жойлашган Ладакх туманида хитойлик ҳарбийлар билан янги тўқнашувлар юз берганини маълум қилган. Таъкидланишича, тўқнашувлар Пангонг-Цо кўли бўйида 30 августга ўтар кечаси юз берган.