Тошкент давлат стоматология институтида Ўзбекистон-Германия имплантологлар форуми ўтказилди

18 сентябрь куни Тошкент давлат стоматология институтида Германия ва россиялик олимлар билан ҳамкорликда Ўзбекистонда стоматологик соҳага кириб келаётган янги операция усуллари, технологиялари ҳақида «Имплантациянинг методикалари. Тишсиз жағларнинг тўлиқ реабилитацияси, эстетик ва функционал тикланиш» илмий форуми бўлиб ўтди. 

 Ушбу тадбирда Тошкент давлат стоматология институти ректори Нодир Ҳайдаров, халқаро ҳамкорлик ишлари бўйича проректор Бекзод Ярмуҳамедов, институт фан докторлари Авзал Акбаров, Севара Ризаева, шунингдек, «DENTAL GURU» компанияси директори, Европа остеоинтеграция ассосацияси томонидан сертификатланган имплантолог Камиль Ҳабиев ўз маърузалари билан қатнашди.

Эътироф этмоқ керак, сўнгги йилларда юртимизда олий таълим тизимини комплекс ривожлантиришнинг энг муҳим вазифалари белгилаб берилди. Хусусан, ҳар бир олий таълим муассасаси каби Тошкент давлат стоматология институти томонидан хориждаги етакчи турдош илмий-таълим муассасалари билан истиқболли ҳамкорлик алоқалари йўлга қўйилмоқда. Ўқув жараёнига халқаро таълим стандартларига асосланган энг замонавий педагогик технологиялар, таълим дастурлари ва ўқув-методик материалларни кенг жорий этиш, илмий-педагогик фаолиятга юқори малакали чет эл ўқитувчилари ва олимларини жалб этиш белгиланган.

Маълумот ўрнида айтиш лозим, таълим сифатини назорат қилиш инспекцияси томонидан тузилган рейтингда Тошкент давлат стоматология институти юртимиз олий ўқув юртлари орасида 8-ўринни эгаллаб турибди. Тиббий олий таълим муассасалари орасида эса 1-ўринни эгаллаган.

Тошкент давлат стоматология институти матбуот хизмати