Трамп Эронга қурол етказиб берган мамлакатларга санкциялар киритилиши тўғрисидаги фармонни имзолади

Таъкидланишича, Трампнинг фармони Эроннинг қурол сотишини ҳам, бу мамлакатга қурол экспортини ҳам тақиқлайди.

АҚШ президенти Дональд Трамп Эронга қурол-яроғ етказиб берувчиларга нисбатан санкциялар киритилиши тўғрисидаги фармонни имзолади. Бу ҳақда Трампнинг миллий хавфсизлик бўйича ёрдамчиси Роберт О'Брайен маълум қилди.

"Бугун президент Эроннинг ядровий технологиялар, баллистик ракеталар ишлаб чиқариш технологиялари ва оддий қуролларга эга бўлишини чеклаш бўйича қатъий чоралар қабул қилди", - деди О'Брайен ушбу фармон тўғрисида маълум қиларкан.

Унинг таъкидлашича, Трампнинг фармони Эроннинг қурол сотишини ҳам, бу мамлакатга қурол экспортини ҳам тақиқлайди.

О'Брайеннинг сўзларига кўра, Трамп маъмурияти шунингдек, Эроннинг ядровий қурол ишлаб чиқиш дастурига алоқадор 27 ташкилот ва шахсларга нисбатан ҳам санкция ва чекловлар киритади.

АҚШ давлат котиби Майк Помпео шанба куни БМТнинг Эронга қарши санкциялари ташкилотнинг қаршилигига қарамасдан яна кучга кирганини эълон қилди. Помпео санкцияларга риоя қилмаган мамлакатлар АҚШнинг бир томонлама ҳаракатларига дуч келишини айтди.