Хитойда Си Цзинпинни “масхарабоз” деб атаган таниқли тадбиркор 18 йилга озодликдан маҳрум этилди

Хитойлик таниқли тадбиркор, Huayuan Real Estate Group давлат компаниясининг собиқ раҳбари Жэн Чжицян 18 йилга панжара ортига жўнатилди ва 4,2 млн юан (620 минг доллар) миқдорида жаримага тортилди. Бундан аввалроқ тадбиркор Хитой раиси Си Цзинпинни “масхарабоз” деб атаган.
        
Пекин суди Хитой ҳукуматини танқид қилиши билан танилган Жэнни Huayuan’га раҳбарлик қилган вақтида 16,3 млн доллар миқдорида давлат маблағларини ўғирлашда, пора олишда ва ўз ваколатларини суиистеъмол қилишда айбдор деб топган. Суднинг таъкидлашича, 69 ёшли айбланувчи айбига иқрор бўлган ва суд қарори устидан шикоят қилмоқчи эмас.

Жэнь Чжицян Хитой ҳукуматининг “ашаддий” танқидчиси бўлгани сабабли “Жэн Катта замбарак” лақабини олган. Хитой расмий идоралари 2016 йилда унинг 37 млн обуначига эга блогини блоклаб қўйишган. 2020 йил февралида эса Жэн Хитой ҳукуматининг коронавирус авж олиши вақтидаги сиёсатини танқид қилган ва ҳукумат сўз эркинлигини янада чеклаш учун пандемиядан фойдаланаётганини айтган. Жумладан, у Хитой раисининг коммунистик партия аъзоларига мурожаатига изоҳ бериб, Си Цзинпин тимсолида “ўзининг янги кўйлагини кўз-кўз қилаётган императорни эмас, балки кийимсиз бўлган ва ҳали ҳам ўзини император деб ҳисоблаётган масхарабозни” кўрганини айтган.  
 
Жэн ушбу танқидидан кейин тўсатдан ғойиб бўлган. Кейинроқ у ҳибсга олингани маълум бўлган. Апрелда унга коррупция бўйича жиноий иш қўзғатилган, июлда эса у партия сафидан чиқариб юборилган. 

CNN телеканалининг таъкидлашича, Хитойда раҳбарият учун номақбул сиёсатчилар ва партия аъзоларига қарши кўпинча коррупция бўйича айблов қўлланади.