Хитой АҚШга Эрон билан можарони ҳал этишда ёрдам таклиф қилди

Хитой раиси Си Жинпинг АҚШ президенти Доналд Трампга Эрон билан можарони ҳал этишда ёрдам беришни таклиф қилди. Бу ҳақда Америка президенти Fox News телеканалига берган интервьюсида маълум қилди.

«Раис Си келишувни кўрмоқчи. Ва у ёрдам таклиф қилди. У: «Агар мен бирор нарсада ёрдам бера олсам, ёрдам беришни истардим», деб айтди», деди Доналд Трамп. Унинг сўзларига кўра, Хитой раҳбари, шунингдек, Пекин Эронга ҳарбий техника етказиб бермаслигини ваъда қилган.

Шу билан бирга, Си Жинпинг Хитой Эрондан катта миқдорда нефть сотиб олаётганини таъкидлаб, бундай таъминотни давом эттириш муҳимлигини таъкидлади. Доналд Трампнинг айтишича, томонлар Ҳўрмуз бўғози, жумладан, энергия етказиб бериш учун ҳам очиқ қолиши кераклигига келишиб олган. Америка президенти, шунингдек, Хитой ҳукумати Американинг Boeing компаниясидан 200 та самолёт сотиб олишга рози бўлганини айтди.

Доналд Трамп Хитойга 13 май куни борди. Бу унинг 2017 йилдан бери мамлакатга илк ташрифидир. Америка президенти Хитой делегацияси билан музокаралари «ўта ижобий» бўлганини айтди. Си Жинпингнинг айтишича, Хитой ва АҚШ «муваффақиятга эришиш ва бутун дунё фаровонлигига ҳисса қўшишда бир-бирига ёрдам бериши мумкин». Трампга Американинг 16 та энг йирик компанияси раҳбарлари ҳамроҳлик қилмоқда, улар орасида Tesla, Apple, Boeing, Goldman Sachs ва Nvidia ҳам бор.