Вирус дунё бўйича қарийб бир миллион кишини ўлдирди, 30 миллиондан ортиқ кишини зарарлади, у назоратдан чиқиб кетди, деди Антониу Гутерриш.
Инсоният янги коронавирус пандемияси синовидан ўта олмади, қурбонлар сони бир миллионга яқинлашмоқда. Бу ҳақда БМТ бош котиби Антониу Гутерриш Хавфсизлик Кенгашининг коронавирус бўйича йиғилишида айтди.
«Пандемия – халқаро ҳамкорлик учун яққол синов бўлиб, биз бу синовдан ўта олмадик. Вирус дунё бўйича қарийб бир миллион кишини ўлдирди, 30 миллиондан ортиқ кишини зарарлади, у назоратдан чиқиб кетди», деди БМТ бош котиби.
«Бу глобал тайёргарлик, ўзаро ҳамкорлик, бирлик ва якдилликнинг етарли эмаслиги оқибатидир», – деб ҳисоблайди Гутерриш.
«Коронавируснинг қора кўланкаси бутун дунёга соя солмоқда. Аммо у бизни ҳаракатга ундаши лозим бўлган огоҳлантириш ҳамдир. Бошқа йўлимиз йўқ. Глобал институтлар доирасида бирлашамиз ёки парокандалик ортидан яксон бўламиз», – дея хулоса қилди у.
