Зеленский Қримни Россиядан қайтариб олиш ўзининг устувор вазифаси эканлигини айтди

«Биз Қора денгиз ҳудудида 2та Украина ҳарбий-денгиз базасини қуришни бошлаймиз», – деган президент.

Зеленскийнинг тушунтиришича, расмий Киев Украина ҳудудини бошқаларга бериб қўймайдиган армия ташкил қилмоқда. Қримни «жангсиз» бериб қўйганлар эса жавобгарликка тортилиши керак.

«Биз Украинани қуруқликда, денгизда, ҳавода ва кибер майдонда ҳимоя қила оладиган армия қурамиз. Бизнинг ҳудудий яхлитлигимиз ва суверенитетимизга дахл қилиш бошқа ҳеч кимнинг хаёлига ҳам келмасин. Бошқалар Украина ҳудудининг бир қисмини битта ҳам ўқ отмасдан тортиб олиш мумкин дея ўйламасин», – деди Зеленский.

Унинг сўзларига кўра, бу ҳолатда гап ҳудуд ҳақида эмас, адолат ҳақида кетмоқда. Шу билан бирга, Зеленский Донбассда тинчлик ўрнатиш ва Россия томонидан оккупация қилинган Қримни қайтариб олиш устувор вазифа эканлигини таъкидлади.